راولا کوٹ (پی پی آئی)راولا کوٹ کے قریب مسافروں سے بھری بس کھائی میں جا گری جس کے نتیجے میں 4 مسافر جاں بحق اور 10 زخمی ہو گئے۔ پی پی آئی کے مطابق مسافر بس کھائی گلی سے راولپنڈی جا رہی تھی کہ شاہراہ غازی ملت پر گوئیں نالہ کے مقام پر گہری کھائی میں جا گری، خوفناک حادثے کے نتیجے میں 4 افراد موقع پر دم توڑ گئے جبکہ 10 شدید زخمی ہو گئے۔مقامی باشندوں نے زخمیوں کو نکالنے کی کوشش کی تاہم امدادی ٹیموں نے پہنچ کر زخمیوں کو ہسپتال پہنچانے کی کارروائی مکمل کی۔ حادثے کی ابتدائی وجہ تیز رفتاری بتائی گئی ہے۔

کراچی (پی پی آئی)کراچی میں غیر قانونی طور پر پرائز بانڈز اور کرنسی نوٹ فروخت کرنے والے ملزم کو گرفتار کر لیا گیا۔پی پی آئی کے مطابق اینٹی منی لانڈرنگ ایف آئی اے کے ایڈیشنل ڈائریکٹر حفیظ اللہ اور سٹیٹ بینک سرکل کے ایڈیشنل ڈائریکٹر جبار میندھرو پر مشتمل ٹیم نے بولٹن مارکیٹ میں واقع دکان میں کارروائی کی۔دکان پر پرائز بانڈز کی غیر قانونی فروخت کی جا رہی تھی، سید محمد مصطفیٰ کو حراست میں لے کر بڑی تعداد میں مختلف مالیت کے پرائز بانڈز اور کرنسی نوٹ برآمد  کر لئے۔

 کراچی (پی پی آئی)قومی کھیل کوبڑا دھچکا لگا  کہ انٹرنیشنل ہاکی فیڈریشن نے اولمپکس کوالیفائنگ راؤنڈ کی میزبانی کے حقوق پاکستان ہاکی فیڈریشن سے واپس لے لیے ہیں۔پی پی آئی کے مطابق  کوالیفائنگ راؤنڈ اگلے برس لاہور میں منعقدہونا تھا۔پاکستان ہاکی فیڈریشن  نے بتایا کہ ایف آئی ایچ نے پاکستان ہاکی فیڈریشن کو اپنے فیصلے سے آگاہ کیا اور اس کی وجہ عدم تعاون اور پی ایچ ایف کے معاملات میں (حکومتی) مداخلت قرار دیا، ایف آئی ایچ نے سنگین تحفظات کے سبب پاکستان سے میزبانی کے حقوق واپس لیے۔پریس ریلیز میں بتایا گیا کہ عالمی ایونٹس کے لیے حکومتی تعاون کی ضرورت ہوتی ہے، جو حکومتِ پاکستان، وزارت بین الاصوبائی روابط اور پاکستان اسپورٹس بورڈ فراہم کرتی ہے، اولمپک کوالیفائر جیسے ایونٹ کا انتظام حکومتی معاونت کے بغیر کرنا ناممکن ہے، لہٰذا اولمپک کوالیفائر ایونٹ کی میزبانی کے حقوق پاکستان سے واپس لیے جاتے ہیں۔