اسلام آباد (پی پی آئی) ڈسٹرکٹ اینڈ سیشن کورٹس اسلام آباد کے ڈیوٹی جج وقاص احمد راجہ نے ایمان مزاری کی درخواست ضمانت پر محفوظ فیصلہ سنا دیا۔عدالت نے دہشتگردی اور اداروں میں بغاوت پرا کسانے کے کیس میں نامزد ایمان زینب مزاری کی درخواست ضمانت منظور کرلی اور 30 ہزار کے ضمانتی مچلکے جمع کرانے کا حکم دے دیا۔پی پی آئی کے مطابق سابق وفاقی وزیر شیریں مزاری کی بیٹی ایمان کو اسلام آباد پولیس نے گرفتار کیا تھا، ان کی گرفتاری پی ٹی ایم کے جلسے میں شرکت کے بعد ہوئی تھی۔

 اسلام آباد (پی پی آئی) پاکستان مسلم لیگ (ن) کی نائب صدر اور چیف آرگنائزر مریم نواز کی ضمانت منسوخی کیلئے  نیب کی جانب سے درخواست سپریم کورٹ نے خارج کر دی۔پی پی آئی کے مطابق نیب کی جانب سے  مریم نواز کی ضمانت منسوخی  کیلئے درخواست دائر کی گئی تھی، نیب نے مریم نواز کے خلاف درخواست واپس لے لی،نیب کی جانب سے کیس میں تحریری جواب عدالت میں جمع کرا گیا جسے چیف جسٹس نے نیب پراسیکیوٹر کو پڑھنے کی ہدایت کی۔ نیب پراسیکیوٹر کی جانب سے کہا گیا کہ مریم نواز کا کیس نیب ترامیم کے بعد قابل سماعت نہیں رہی،  چیف جسٹس نے نیب پراسیکیوٹر سے کہا کہ اگر درخواست نمٹائیں گے تو آپ کو پسند آئے گا؟  نیب پراسیکیورٹر نے جواب دیا کہ درخواست خارج کرنے کی بجائے نمٹا دیں،نیب ترامیم کی وجہ سے موجودہ کیس واپس لے رہے ہیں،عدالت نے مریم نواز کے خلاف نیب درخواست خارج کرتے ہوئے کیس نمٹا دیا۔نیب نے 2019 میں شمیم شوگر ملز کیس میں مریم نواز کی ضمانت منسوخی کیلئے درخواست دائر کی تھی، چیف جسٹس پاکستان کی سربراہی میں 3رکنی بنچ نے کیس کی سماعت کی۔

کراچی (پی پی آئی) پاکستانی شوبز کی معروف اداکارہ ثروت گیلانی نے بھی مستقبل میں مسرت شاہین،سید کمال،جواد احمد و دیگر فنکاروں کی طرح اپنی سیاسی جماعت بنانے کا عندیہ دے دیا۔پی پی آئی کے مطابق میڈیا سے گفتگو کے دوران سیاست میں قدم رکھنے کے سوال پر ثروت کا کہنا تھا کہ مجھے بہت سی جماعتوں نے شمولیت کی آفر کی ہے کیونکہ میں ہمیشہ آواز اٹھاتی ہوں مگر مستقبل میں ہوسکتا ہے کہ میں اپنی سیاسی جماعت بناؤں، تاہم اداکارہ نے اس حوالے سے مزید تفصیلات نہیں بتائیں لیکن انہوں نے بتایا کہ وہ ملک میں تعلیم مفت کریں گی۔

راولپنڈی(پی پی آئی)رینجرز نے بھارت سے اسمگلنگ کی بڑی کوشش ناکام بناتے ہوئے 6 بھارتی شہریوں کوگرفتار کرلیا۔بھارتی اسمگلرز/جرائم پیشہ افراد منشیات، ہتھیار اور ایمونیشن پاکستان اسمگل کرنے کی کوشش کر رہے تھے۔ پاک فوج کے شعبہ تعلقات عامہ (آئی ایس پی آر) کے مطابق بھارتی اسمگلروں کی بی ایس ایف کے زیر نگرانی بارڈر سے بلاروک ٹوک نقل وحرکت حیران کن ہے، بھارتی بی ایس ایف کا اسمگلروں کے ساتھ ممکنہ گٹھ جوڑبعیدازقیاس نہیں۔ گرفتاربھارتی شہریوں میں فیروزپور کے رہائشی گرمیج سنگھ، شندر سنگھ، جگندر سنگھ، وشال سنگھ شامل ہے جب کہ جالندھرکے  مہندر سنگھ اور لدھیانہ سے تعلق رکھنے والے گروندر سنگھ کو بھی گرفتار کیا گیا ہے۔پی پی آئی کے مطابق  گرفتار اسمگلروں کے خلاف پاکستان میں غیرقانونی داخلے پر پاکستانی قوانین اور ریاست مخالف سرگرمیوں پر کارروائی ہوگی۔