کراچی (پی پی آئی) ملک میں تیل اورگیس کی مقامی پیداوارمیں ہفتہ واربنیادوں پرمعمولی کمی ریکارڈکی گئی ہے۔موصولہ اعدادوشمارکے مطابق ختم ہونے والے ہفتہ میں ملک میں تیل کی اوسط یومیہ پیداوار70146 بیرل ریکارڈکی گئی جوپیوستہ ہفتہ کے مقابلہ میں 0.5 فیصدکم ہے،پیوستہ ہفتہ میں ملک میں تیل کی اوسط یومیہ پیداوار70513 بیرل ریکارڈکی گئی تھی۔پی پی آئی کے مطابق ختم ہونے والے ہفتہ میں ملک میں گیس کی اوسط یومیہ پیداوار3311 ایم ایم سی ایف ڈی ریکارڈکی گئی جوپیوستہ ہفتہ کے مقابلہ میں 0.5 فیصدکم ہے،پیوستہ ہفتہ میں ملک میں گیس کی اوسط یومیہ پیداوار3328 ایم ایم سی ایف ڈی ریکارڈکی گئی تھی۔اعدادوشمارکے مطابق ختم ہونے والے ہفتہ میں اوجی ڈی سی ایل کی خام تیل کی اوسط یومیہ پیداوار32846 بیرل، پی پی ایل 11711 بیرل، پی اوایل 5084 بیرل اورماڑی گیس کی خام تیل کی اوسط یومیہ پیداوار985 بیرل ریکارڈکی گئی،اسی طرح ختم ہونے والے ہفتہ میں اوجی ڈی سی ایل کی گیس کی اوسط یومیہ پیداوار712 ایم ایم سی ایف ڈی، پی پی ایل 657، پی اوایل 66 اور ماڑی گیس کی گیس کی اوسط یومیہ پیداوار926 ایم ایم سی ایف ڈی ریکارڈکی گئی۔

کراچی (پی پی آئی)پاکستان میں منتخب قومی اسمبلی اپنی پانچ سال کی مدت پوری کرنے کے بعد تحلیل ہو چکی ہے۔ اب نئی اسمبلی کے انتخاب کے لیے نئے الیکشنز کا انتظار ہو رہا ہے۔عام طور پر قومی اسمبلی کی مدت پوری ہونے کے بعد اگلے الیکشن کی گہما گہمی ہوتی ہے لیکن اس بار بالکل ہی نہیں۔سیاسی مبصرین کہتے ہیں کہ  لاہور اورکراچی جو سیاسی سرگرمیوں کے گڑھ مانے جاتے ہیں وہاں بھی سکوت ہے۔ کسی سیاسی پارٹی کا دفتر آباد دکھائی نہیں دیتا۔۔ اس ساری صورت حال سے ایک سوال ذہن میں اٹھتا ہے کہ کیا ملک عام انتخابات واقعی کسی سیاسی جماعت کی ترجیح نہیں رہے؟ اور کیا الیکشن ہو بھی رہے ہیں یا نہیں؟ کہاجارہا ہے کہ الیکشن اگلے سال ہوں گے اور سیاسی جماعتوں کی خاموشی کا مطلب ہے کہ اندرونی طور پر ان کی مقتدرہ سے مفاہمت  ہوچکی ہے۔‘ ملک میں کسی بھی سیاسی جماعت نے ابھی عوامی رابطہ مہم شروع نہیں کی ہے۔۔سیاسی مبصرین کا خیال ہے کہ جو اس وقت ملک کی معاشی صورت حال ہے، خاص طور پر بجلی کے بلوں نے لوگوں کو متاثر کیا ہے اس سے بھی سیاسی معاملات ماند پڑے ہیں۔ پاکستان میں انتخابات اور جمہوری عمل پر نظر رکھنے والے ادارے پلڈاٹ کے سربراہ احمد بلال محبوب کا کہنا ہے کہ ’اس وقت فیصلہ ساز چاہے وہ سیاسی ہوں یا اسٹیبلشمنٹ ان کے سامنے ملکی معیشت کی صورت حال ہے۔ یہ بات درست ہے کہ قومی اسمبلی کی مدت پوری ہونے کے بعد کبھی بھی پاکستان میں اتنا سیاسی سناٹا نہیں دیکھا گیا۔ دوسری طرف  مسلم لیگ ن کے قائد نواز شریف نے جو ستمبر کے مہینے میں وطن واپس آنے کا ارادہ رکھتے تھے اب اسے بھی ملتوی کر دیا  ہے۔

لندن (پی پی آئی)مسلم لیگ ن نے نواز شریف کی وطن واپسی سے قبل سوشل میڈیا اور الیکٹرانک میڈیا پر بھرپور بھرپور مہم چلائی جائے گی، کسی بھی سیاسی جماعت سے اتحاد یا سیٹ ایڈجسٹمنٹ کا فیصلہ نواز شریف کریں گے۔پی پی آئی کے مطابق عام انتخابات میں ن لیگ کی جانب سے مصالحانہ کی بجائے جارحانہ انداز اپنانے کا فیصلہ کیا گیا ہے۔ذرائع کے مطابق آئندہ عام انتخابات میں ن لیگ انتخابی مہم میں اپنے ساتھ ہونے والی انتقامی کارروائیوں کو ڈاکومینٹری کی صورت میں سامنے لائے گی، انتخابی مہم میں سابقہ چند اہم شخصیات کو ہدف تنقید بنایا جائے گا۔پارٹی ذرائع کاکہنا ہے کہ مریم نواز انتخابی مہم میں بڑی اہم شخصیات کی خفیہ آڈیوز اور نوازشریف کے خلاف کی گئی سازش کو بے نقاب کریں گی نواز شریف اور مریم نواز اپنے ساتھ ہونے والی سازش کے پس پردہ محرکات کو سامنے لائیں گے۔مسلم لیگ ن نے فیصلہ کیا ہے کہ شہباز شریف اور سابق وزیراعلیٰ پنجاب حمزہ شہباز عوامی اجتماعات میں مصالحانہ رویہ اپنائیں گے، شہباز شریف اور حمزہ شہباز اپنے دور کے ترقیاتی منصوبوں پر بات کریں گے۔ذرائع کے مطابق نواز شریف کی وطن واپسی سے قبل سوشل میڈیا اور الیکٹرانک میڈیا پر بھرپور بھرپور مہم چلائی جائے گی، کسی بھی سیاسی جماعت سے اتحاد یا سیٹ ایڈجسٹمنٹ کا فیصلہ نواز شریف کریں گے۔