اسلام آباد (پی پی آئی)  پی ٹی آئی  کے چیئرمینعمران خان اور شاہ محمود قریشی کی درخواست ضمانت بعد از گرفتاری پر بغیر سماعت کارروائی ملتوی کر دی گئی۔پی پی آئی کے مطابق  آفیشل سیکرٹ ایکٹ کی عدالت کے جج ابوالحسنات ذوالقرنین رخصت پر ہیں، عدالتی عملے کی جانب سے جج کی رخصت بارے آگاہ کر دیا گیا۔ چیئرمین پی ٹی آئی عمران خان اور شاہ محمود قریشی کی درخواست ضمانت بعد از گرفتاری پر بغیر سماعت کارروائی ملتوی کر دی گئی۔ سماعت 11 ستمبر تک ملتوی کی گئی ہے۔یاد رہے کہ گزشتہ 2 سماعتوں پر بھی جج کی رخصت پر بغیر کارروائی سماعت ملتوی ہو گئی تھی۔

 سری نگر (پی پی آئی)متحدہ مجلس علما  مقبوضہ جموں وکشمیر  کے سربراہ میرواعظ عمر فاروق کی گھر میں مسلسل غیر قانونی نظربندی اور انہیں مسلسل 211 ویں جمعہ کو جامع مسجد سرینگر میں نماز جمعہ کی ادائیگی کی اجازت نہ دینے پر مقبوضہ وادی کی مساجد میں علمائے کرام نے  سخت تشویش ظاہر کی متحدہ مجلس علما جموں وکشمیر کے سرکردہ اراکین نے افسوس ظاہر کیاکہ میر واعظ عمر فاروق 4 اگست 2019سے مسلسل گھر میں نظر بند ہیں اور قابض انتظامیہ نے انکی مذہبی اور سیاسی سرگرمیوں پر قدغن عائد کر رہی ہے۔ انہوں نے میرواعظ کی طویل ترین نظربندی پرسخت ردعمل کا اظہار کرتے ہوئے کہا کہ انکی مسلسل غیر قانونی نظر بندی کی وجہ سے جامع مسجد کے منبر و محراب گزشتہ4 سال سے زائد عرصے سے رشدو ہدایت، قال اللہ وقال الرسول ﷺ پر مبنی مواعظ حسنہ اور دعوت و تبلیغ سے مکمل طور پر خاموش ہیں۔مجلس علما نے میرواعظ عمر فاروق کے علاوہ معروف خطیب اوراسکالر مولانا مشتاق احمد ویری اور مولوی عبدالرشید دادی کے علاوہ مجلس کے جنرل سیکریٹری مولانا سید الرحمن شمس رہائی کا بھی مطالبہ کیا جو کہ کئی برس سے جیلوں میں قید ہیں۔علاوہ ازیں مختلف مقامات پر میرواعظ عمر فاروق کی گھر میں مسلسل غیر قانونی نظربندی کیخلاف احتجاج اور رہائی کیلئے مظاہرے بھی کئے گئے۔

اسلام آباد(پی پی آئی) سابق وزیراعلیٰ چوہدری پرویز الہیٰ کو انسدادِ دہشتگردی کی عدالت میں پیش کیا گیا توکمرہ عدالت میں وکیل نے اپنے فون سے پرویز الٰہی کی شیخ رشید سے بات کروائی۔ذرائع کے مطابق پرویز الہیٰ اور شیخ رشید کے مابین دو بار ٹیلیفونک رابطہ ہوا۔پی پی آئی کے مطابق پرویز الہیٰ نے شیخ رشید کو کہا کہ مجھے دو دن تھانہ سی آئی اے میں رکھا جس میں آپ کو رکھاگیا۔بہت ظالم لوگ ہیں، میں نے بتایا دل میں اسٹنٹ پڑے ہوئے ہیں۔ آپ کے بارے میں تھانے والے بتا رہے تھے کہ جب شیخ رشید گرفتار تھے تو انہیں بخار تھا۔تو کہا گیا شیخ رشید کو رضائی نہیں دینی، پھر کچھ لوگوں نے رضائی کمبل آپ کو دئیے۔ پرویز الٰہی نے نگران وزیراعلی پنجاب کا بھی فون کال پر تذکرہ کیا۔انہوں نے کہا کہ نگران وزیراعلی پنجاب میرا رشتہ دار ہے لیکن حالات آپ کو معلوم ہیں۔عمران کے ساتھ کھڑے ہیں، انہیں سب معلوم ہے۔پی ٹی آئی میں باقیوں کا آپ کو معلوم ہے۔