سوات اور مانسہرہ میں بھی برف باری، سیاحوں کے چہرے کھل اٹھے، موسم سے لطف اندوز، درجہ حرارت منفی تین ڈگری سینٹی گریڈ
مری (پی پی آئی) رواں موسم سرما کی پہلی برف باری مری میں جمعرات کو ہوئی جس کے بعد سیاحوں کی تعداد میں اچانک اضافہ ہو رہا ہے۔پی پی آئی کے مطابق انتظامیہ نے اعلان کیا ہے کہ اس مرتبہ ہل اسٹیشن پر گاڑیوں کا داخلہ محدود کیا جائے گا تاہم اس کے باوجود کنڈلہ کے مقام پر گاڑیاں پھنسے کی اطلاعات آئی ہیں۔گذشتہ برس مری میں برفانی طوفان میں پھنس کر 22 افراد جاں بحق ہوگئے تھے۔ اس سانحے کے پیش نظر رواں سیزن انتظامیہ نے کڑے انتظامات کیے ہیں۔جمعرات کو مری کے علاوہ سوات اور مانسہرہ میں بھی برف باری ہوئی ہے۔مری میں برف باری کا آغاز دن کے وقت ہوا اور سڑکوں پر برف کی باریک تہہ بننے لگی ہے۔ سیاحوں کے چہرے کھل اٹھے اور وہ موسم سے لطف اندوز ہونے کے لیے سڑکوں پر نکل آئے۔برف باری کے ساتھ ہی درجہ حرارت منفی تین ڈگری سینٹی گریڈ تک پہنچ گیا۔ راولپنڈی اسلام آباد اور دیگر قریبی علاقوں میں بھی سردی بڑھ گئی۔