قابل ضمانت وارنٹ جاری کرنے کا فیصلہ ہائیکورٹ کے فیصلے کی توہین ہے:فواد چوہدری
اسلام آ باد(پی پی آ ئی)الیکشن کمیشن اور چیف الیکشن کمشنر توہین کیس میں وارنٹ گرفتاری ہونے پر فواد چوہدری نے الیکشن کمیشن کیخلاف عدالت جانے کا اعلان کردیا۔پی ٹی آئی رہنما فواد چوہدری نے الیکشن کمیشن کی جانب سے وارنٹ گرفتاری جاری کرنے پر ردعمل دیتے ہو ئے کہا کہ الیکشن کمیشن کاقابل ضمانت وارنٹ جاری کرنیکا فیصلہ ہائی کورٹ کے فیصلے کی توہین ہے۔فواد چوہدری نے کہا کہ توہین الیکشن کمیشن کیس کی تاریخ 17 جنوری تھی جس کو رولز کے خلاف آج مقرر کرکے فیصلہ دیا گیا۔یہ الیکشن کمیشن کے ممبران کاایک اور جانبدارنہ فیصلہ ہے، اس فیصلے کے خلاف ہائی کورٹ میں توہین عدالت کا مقدمہ کریں گے۔خیال رہے کہ الیکشن کمیشن نے توہین الیکشن کمیشن کیس میں عمران خان، فواد چوہدری اور اسد عمر کے وارنٹ گرفتاری جاری کیے ہیں۔