غیرقانونی زمین پرقبضہ کا حامی نہیں لیکن بلڈوزرپہلاآپشن نہیں ہوتا‘ عمر عبداللہ

سری نگر (پی پی آئی)مقبوضہ جموں و کشمیر نیشنل کانفرنس کے نائب صدر عمر عبداللہ نے کہا ہے کہ حکومت جموں و کشمیر کے لوگوں کو ہراساں کرنا بند کرے۔ ہم غیر قانونی زمین پر قبضہ کرنے والوں کی حمایت نہیں کر رہے ہیں۔ لیکن اس کے لیے کوئی طریقہ کار ہونا چاہیے۔ انہدام سے پہلے کسی کو نوٹس کیوں نہیں دیا گیا۔ سری نگر شہر میں تجاوزات کی فہرست سوشل میڈیا پر منظر عام پر آنے کے بعد جموں و کشمیر کی سیاسی جماعتوں نے مرکز کے زیر انتظام علاقہ میں خوف و ہراس پھیلانے کے لیے حکومت سے وضاحت طلب کی ہے۔ نیشنل کانفرنس کے نائب صدر عمر عبداللہ نے کہا کہ حکومت زمین سے ٹیلر ایکٹ کو ہٹانا چاہتی ہے اور دعویٰ کیا کہ بلڈوزر بغیر کسی قانونی طریقہ کار کی پیروی کیے گھروں پر لائے جاتے ہیں۔عبداللہ نے سری نگر میں ایک پریس کانفرنس کے دوران سوشل میڈیا پر گردش کرنے والی فہرست کے بارے میں حکومت سے وضاحت طلب کی اور کہا کہ اگر پبلک ڈومین کی فہرست جعلی ہے تو مختلف جگہوں پر بلڈوزر کس بنیاد پر بھیجے جا رہے ہیں۔ وہ (افسران) جہاں بھی جاتے ہیں کوئی کاغذی کام نہیں کرتے۔ جب وہ میرے رشتہ داروں کے گھر گئے تو انہیں اطلاع نہیں دی گئی اور بلڈوزر زبردستی احاطے کے اندر لے جایا گیا۔