نفرت آمیز رویوں کے خاتمے کیلئے پاکستان عالمی برادری کے ساتھ ہے:وزیراعظم

اسلام آ باد(پی پی آ ئی)وزیراعظم شہبازشریف نے کہا ہے کہ نفرت آمیز رویوں کے خاتمے کیلئے پاکستان عالمی برادری کے ساتھ ہے۔ وزیراعظم شہبازشریف نے اسلاموفوبیا سے نمٹنے کے عالمی دن کے موقع پر اپنے پیغام میں کہا ہے کہ پاکستان عقیدے کی بنیاد پر مسلمانوں کے خلاف ہر قسم کی نفرت اور امتیازی سلوک کے خاتمے کے لیے عالمی برادری کے ساتھ کھڑا ہے۔ اسلام دیگرمذاہب کی طرح ترقی جیسی اعلیٰ اقدارکی تلقین کرتاہے، اسلام امن، رواداری، انسانیت کے احترام کا درس دیتا ہے۔یاد رہے کہ گذشتہ سال اقوام متحدہ نے ایک قرارداد میں 15 مارچ کو اسلامو فوبیا کے خلاف عالمی دن قرار دیا تھا۔اسلاموفوبیا کے خلاف یہ قرارداد او آئی سی کی جانب سے اقوام متحدہ میں پاکستان کے مستقل نمائندے منیراکرم نے پیش کی تھی۔یہ قرارداد نیوزی لینڈ کے شہر کرائسٹ چرچ کی دو مساجد پر مسلح شخص کے حملے کے 3 سال مکمل ہونے پر پیش کی گئی۔ ان حملوں میں 51 نمازی جان سے گئے اور 40 زخمی ہوئے تھے۔