روپے کی گھٹتی قدر اور سبسڈیز ختم کرنے سے مالی مشکلات میں اضافہ

کراچی (پی پی آئی)روپے کی گھٹتی قدر اور سبسڈیز ختم کرنے کے حکومتی اقدام کی وجہ سے ملکی آبادی کی مالی مشکلات میں اضافہ ہوا ہے۔ اس صورتحال میں تعلیم یافتہ ملازمت پیشہ طبقہ اپنی ضروریات اور اخراجات محدود کرنے پر مجبور ہے۔ پی پی آئی کے مطابق متعدد ایسے افراد کیلئے جن کی آمدنی عام آدمی سے کہیں زیادہ ہے بچوں کو تعلیم دلوانا اب ان کے لیے مشکل ہو گیا ہے۔ان میں وہ لوگ بھی شامل ہیں جن کی ماہانہ آمدنی پاکستان کی اوسط ماہانہ تنخواہ سے دو گنا سے بھی زیادہ ہے۔ لیکن ان کا کہنا ہے کہ فی الحال ان کے پاس اپنی بیٹیوں کو اسکول کے بجائے گھر پر پڑھانے اور امتحانات میں ان کی رجسٹریشن ملتوی کرانے کے سوا کوئی چارہ نہیں کیونکہ یہ اخراجات ان کی استطاعت سے باہر ہیں۔