شہریار آفریدی کا 2روزہ جسمانی ریمانڈ منظور پولیس کے حوالے

اسلام آ باد(پی پی آ ئی)ڈسٹرکٹ اینڈ سیشن کورٹ اسلام آباد نے نو مئی کو توڑ پھوڑ اور جلاؤ گھیراؤ پر تھانہ آئی نائن میں درج مقدمے میں سابق وفاقی وزیر شہریار آفریدی کا دو روزہ جسمانی ریمانڈ منظور کرلیا۔اسلام آباد ہائیکورٹ کے حکم پر سابق وفاقی وزیر اور پی ٹی آئی رہنما شہریار آفریدی کو جوڈیشل مجسٹریٹ نوید خان کے روبرو پیش کیا گیا، تفتیشی افسر نے ملزم کے 5 روزہ جسمانی ریمانڈ کی استدعاکی اور کہا شہریار آفریدی کا فوٹوگرامیٹک اور وائس میچنگ کرانی ہے۔ملزم کے وکیل نے جسمانی ریمانڈ کی مخالفت کرتے ہوئے کہا کہ جب ویڈیوز سوشل میڈیا سے لی گئیں تو فوٹو گرامیٹک ٹیسٹ کی ضرورت نہیں۔سابق وفاقی وزیر شہریار آفریدی نے روسٹرم پر آکر کہا میرا بھائی فوت ہوا اور مجھے جنازے میں شریک نہیں ہونے دیا گیا، احتجاج کرنا میرا آئینی حق ہے، میں نے قانون کو ہاتھ میں نہیں لیا۔وکیل کی استدعا پر عدالت نے ملزم کو کمرہ عدالت میں ہی اہلخانہ سے ملنے کی اجازت دے دی، بعد میں شہریار آفریدی کا 2 روزہ جسمانی ریمانڈ منظور کرکے پولیس کے حوالے کر دیا۔