لاہورمیں اغوا برائے تاوان کے طارو گینگ کا خاتمہ، تینوں ملزمان ہلاک

(ویب ڈیسک) لاہور کے علاقے برکی میں پولیس اور اشتہاریوں کے درمیان مبینہ مقابلے میں تین ملزمان ہلاک ہو گئے۔ تفصیلات کے مطابق لاہور کے علاقے برکی میں سی آئی اے کینٹ اور اشتہاریوں کے درمیان فائرنگ کے تبادلے میں اغوا برائے تاوان کے تین ملزمان مارے گئے،پی پی آئی کے مطابق ہلاک ملزمان کی شناخت سرغنہ طاہر عرف طارو،  عبدالرحمان مانا اور فیاضو کے نام سے ہوئی ہے۔ برکی میں سی آئی اے کینٹ کی ٹیم پر زیر حراست ملزمان کے ساتھیوں نے فائرنگ کردی، فائرنگ سے ڈی ایس پی سی آئی اے کینٹ فیصل شریف بال بال بچے جبکہ فائرنگ سے پولیس موبائل کو شدید نقصان پہنچا۔ پولیس کے مطابق ہلاک ملزمان نے چند روز قبل معروف تاجر کو 5 کروڑ روپے تاوان کے لیے اغوا کیا تھا۔