اسلام آباد(پی پی آئی)وزیراعظم کی معاون خصوصی برائے انسانی حقوق مشعال حسین ملک نے اپنے شوہر،جے کے ایل ایف کے چیئرمین محمد یاسین ملک کی جان بچانے کیلئے حقوق انسانی کے بین الاقوامی اداروں سے ایک بار پھرمداخلت کی اپیل کی ہے۔ انہوں نے کہا ہے کہ یاسین ملک کو لگائے گئے پیس میکر کی میعاد ختم ہونے کے باعث ناکارہ ہو چکے ہیں، ان کی جان کو خطرات لاحق ہیں۔پی پی آئی کے مطابق انہوں نے کہا کہ یاسین ملک عارضہ قلب نیز امراض گردہ میں بھی مبتلا ہیں۔ مصدقہ اطلاعات ہیں کہ یاسین ملک کے جسمانی وزن میں بھی کافی کمی واقع ہوئی ہے جو کہ تشویش کا باعث ہے۔