محکمہ موسمیات نے بارشوں کا الرٹ جاری کردیا

اسلام آ باد (پی پی آئی)محکمہ موسمیات نے ملک کے مختلف علاقوں میں بارش اور آندھی کے جھکڑ چلنے کی پیشگوئی کی ہے،جس کے باعث رواں ہفتے گرمی کی شدت کم ہونے کا امکان ہے۔محکمہ موسمیات نے بارشوں کا الرٹ جاری کردیا،کمزور مغربی ہوائیں بالائی اور وسطیٰ علاقوں میں داخل ہوں گی، جس سے ملک کے مختلف حصوں میں آندھی،جھکڑ اور گرج چمک کے ساتھ بارش کا امکان ہے۔محکمہ موسمیات کے مطابق ملک کے میدانی علاقوں میں موسم شدید گرم رہنے کا امکان ہے،شام کو خطہ پوٹھوہار،بالائی پنجاب اور خیبر پختونخوا میں چند مقامات پر بارش متوقع ہے،اسلام آباد اور گرد و نواح میں مطلع جزوی ابر آلود رہنے اور بارش کا امکان ہے۔راولپنڈی ڈویڑن،گلیات،گجرات، گجرانوالہ،فیصل آباد میں شام کے وقت بارش متوقع ہے،بالائی سندھ اورشمالی بلوچستان میں آندھی اورگرد آلود ہوائیں چلنے کا امکان ہے۔