ملک کے اکتالیس اضلاع میں مختلف دورانیے کی انسداد پولیو مہم کل سے شروع ہوگی

کراچی(پی پی آئی)ملک کے اکتالیس اضلاع میں مختلف دورانیے کی انسداد پولیو مہم کل سے شروع ہوگی۔اس خصوصی مہم کے دوران پانچ سال تک کی عمر کے نوے لاکھ پچاس ہزار بچوں کو پولیو سے بچاؤ کے قطرے پلائے جائیں گے۔مہم میں بلوچستان کے سولہ اضلاع، خیبرپختونخوا کے گیارہ، سندھ کے آٹھ اور پنجاب کے پانچ اضلاع شامل ہیں۔اسلام آباد کی مخصوص یونین کونسلوں میں گھر گھر مہم چلائی جائے گی۔یہ مہم بلوچستان میں پولیو کیسزمیں اضافے کے پیش نظر شروع کی گئی ہے۔نیشنل کمانڈ اینڈ آپریشن سنٹر کے رابطہ کار محمد انور حق کے مطابق مہم ان علاقوں میں شروع کی جارہی ہے جہاں پولیو وائرس مسلسل پایا جاتا ہے۔ انہوں نے والدین سے اپیل کی کہ وہ مہم میں شمولیت کو اپنا قومی فریضہ سمجھیں اور اپنے بچوں کو پولیو سے بچاؤ کے قطرے پلوائیں۔

Latest from Blog