راولا کوٹ جیل قیدی فرارکیس میں ڈپٹی سپرنٹنڈنٹ سمیت 7سکیورٹی اہلکار گرفتار

اولا کوٹ(پی پی آئی)آزاد کشمیر کے ضلع پونچھ کی تحصیل راولاکوٹ کی ڈسٹرکٹ جیل سے قیدیوں کے فرار ہونے کے بعد سات سکیورٹی اہلکاروں کو گرفتار کر لیا گیا ہے۔ اتوار کو ڈسٹرکٹ جیل سے 19 قیدی جیل عملے کو یرغمال بنا کر فرار ہو گئے تھے جبکہ ایک قیدی محمد خیام جیل سے بھاگتے ہوئے گولی لگنے سے ہلاک ہوا۔پی پی آئی کے مطابق حکام نے شبہ ظاہر کیا ہے کہ قیدیوں کے فرار ہونے میں جیل عملہ ملوث ہو سکتا ہے۔ قیدیوں کے فرار کے معاملے پر انکوائری کمیٹی تشکیل دی گئی ہے۔جیل کے ڈپٹی سپرنٹنڈنٹ سمیت سات اہلکاروں کوحراست میں لے کرتحقیقات شروع کردی گئی ہیں۔پولیس کے مطابق جیل سے قیدیوں کے فرار ہونے کا واقعہ اتوار کے روز دوپہر دو بجے کے قریب پیش آیا۔ فرار ہونے والے ملزمان دہشت گردی، قتل، چوری اور منشیات فروشی کی وارداتوں میں ملوث تھے۔ایس پی پونچھ ریاض مغل نے ڈسٹرکٹ جیل سے 19 قیدیوں کے فرار اور ایک کی ہلاکت کی تصدیق کرتے ہوئے بتایاکہ  انہیں دوبارہ گرفتار کرنے کی کوششیں کی جا رہی ہیں۔انہوں نے کہا کہ مختلف مقامات پر ناکے لگا دیے گئے ہیں۔