پاکستان سمیت کئی ممالک میں امیونائزیشن کی کم کوریج سے خسرہ کی وبا میں اضافہ

نیویارک(پی پی آئی)اقوام متحدہ نے بچوں کے حفاظتی ٹیکوں میں تیزی کا مطالبہ کرتے ہوئے کہا ہے کہ گزشتہ سال بچوں کی عالمی ویکسینیشن کا عمل رکنے سے 27لاکھ بچے ویکسین سے محروم ہوگئے تھے۔عالمی ادارہ صحت (ڈبلیو ایچ او) اور اقوام متحدہ کابچوں کا فنڈ (یونیسف) 14 بیماریوں کے خلاف قومی حفاظتی ٹیکوں کی کوریج کے حوالے سے دنیا کا سب سے بڑا اور سب سے زیادہ جامع ڈیٹا سیٹ فراہم کرتے ہیں۔دونوں کی جانب سے کہا گیا ہے کہ 2019 میں وبا سے پہلے کی سطح کے مقابلے میں بچوں کو حفاظتی ٹیکے لگانے کی رفتار 2023 میں سست ہوگئی تھی،اور بہت سے بچے زندگی بچانے والی ان ویکسینز خاص طور پر خسرہ سے بچاو کی ویکسین سے محروم رہ گئے تھے، نئے اعداد و شمار کے مطابق تقریبا چار میں سے تین شیر خواربچے پاکستان سمیت ایسے کئی ممالک میں ہیں جہاں ویکسین کی کم کوریج کی وجہ سے خسرہ کی وبا میں اضافہ ہورہا ہے۔یونیسیف کی ایگزیکٹو ڈائریکٹرکیتھرین رسل کاکہنا ہے کہبہت سے ممالک بہت زیادہ بچوں کو نظر انداز کررہے ہیں۔