مدارس بل سیاسی نہیں دین و ایمان کا مسئلہ ہے،امین انصاری

کراچی(پی پی آئی) متحدہ علماء محاذ پاکستان، متحدہ ختم نبوت فورم پاکستان کے بانی سربراہ مولانا محمدامین انصاری نے کہاہے کہ مدارس بل سیاسی نہیں دین و ایمان کا مسئلہ ہے،کمزورحکومت سنگین حالات میں مدارس مخالفت کی متحمل نہیں ہوسکتی،صدر آصف زرداری مدارس بل مسترد کرکے دینی قوتوں کے صبر کو نہ آزمائیں۔قومی اسمبلی اور سینیٹ کے دونوں ایوان ہائے بالا سے متفقہ منظوری کے بعد صدر مملکت آصف علی زرداری کی جانب سے مدارس بل پر اعتراض لگا کر دستخط نہ کرکے واپس کرنا ایوانوں کے منتخب معزز اراکین کی نہ صرف توہین و تضحیک ہے بلکہ پاکستان کی نظریاتی سرحدوں کے محافظ دینی مدارس سے وابستہ لاکھوں علماء و طلبہ کی آئینی، قانونی،انسانی، اخلاقی ظالمانہ،جانب دارانہ حق تلفی ہے اور یہ سب کچھ اسلام و ملک و آزادی و خودمختاری اور خوشحالی کے دشمن عالمی استعماری قوتوں کے دباؤ و خوشنودی کیلئے ان کی ایماء پر کیاجارہاہے۔متحدہ علماء محاذ پاکستان، متحدہ ختم نبوت فورم پاکستان کے اعلامیہ کے مطابق  مولانا محمدامین انصاری نے کہا کہ  پاکستان بدقسمتی سے نااہل حکمرانوں کی ناعاقبت اندیشی اور غلط پالیسیوں کی وجہ سے پہلے ہی انتشار و سنگین بحرانوں و چیلنجز کا شکار ہے۔ حکومت کو دینی مدارس علماء مشائخ و دینی قوتوں کے ساتھ بلاجواز محاذ آرائی و انتشار سے اجتناب کرنا چاہئے۔