مغربی بلوچستان اور بالائی خیبر پختونخوا میں چند مقامات پرہلکی بارش اور برفباری متوقع

پشاور/کوئٹہ/مظفرآباد 17جنوری(پی پی آئی) محکمہ موسمیات نے مغربی بلوچستان اور بالائی خیبر پختونخوا میں چند مقامات پرہلکی بارش اور برفباری کا امکان ظاہرکیا ہے۔محکمہ موسمیات کا کہنا ہے کہ ملک کے بیشتر علاقوں میں موسم سرد اور خشک جبکہ پہاڑی علاقوں میں شدید سرد رہنے کا امکان ہے،، محکمہ سیاحت خیبرپختونخوا نے ایڈوائزری جاری کر دی ہے، ہدایات جاری کی گئی ہیں کہ سیاح برفباری میں غیرضروری سفرسے گریز کریں، برفباری میں ڈرائیونگ کرتے ہوئے اسنو چین کا استعمال کریں۔محکمہ سیاحت خیبرپختونخوا کا کہنا ہے کہ کسی بھی ناخوشگوار واقعہ کی اطلاع ہیلپ لائن 1422 پر دی جائے،برفباری کا سلسلہ 20 جنوری تک جاری رہنے کاامکان ظاہر کیا گیا ہے۔گلگت بلتستان میں موسم شدید سرد اور مطلع ابرآلود رہنے کی پیشگوئی کی گئی ہے، محکمہ موسمیات کے مطابق آزادکشمیر میں سردی کی شدت برقرار رہے گی۔