گورنر بلوچستان جعفر مندوخیل آج کراچی میں امریکی قونصل جنرل سے ملاقات کریں گے

کراچی 16جنوری (پی پی آئی)گورنر بلوچستان جعفرخان مندوخیل جمعے کو کراچی میں تعینات امریکی قونصل جنرل سے ملاقات کریں گے۔  ملاقات کا مقصد پاکستان اور امریکہ کے درمیان دوستانہ تعلقات کو مزید مستحکم بنانے، موجودہ سیاسی صورتحال سے نمٹنے اور باہمی دلچسپی کے امور پر تبادلہ خیال کرنا ہے۔ گورنر بلوچستان لاس اینجلس، کیلیفورنیا میں حالیہ تباہ کن آتشزدگی پر امریکی قونصل جنرل سے یکجہتی کا اظہار بھی کریں گے جس کے نتیجے میں اب تک کافی جانی و مالی نقصانات ہوئے ہیں۔ اس ضمن میں گورنر بلوچستان نے کہا کہ جیسا کہ ہم پل پل بدلتی ہوئی دنیا میں آگے بڑھ رہے ہیں، ضروری ہے کہ ہم اپنے بین الاقوامی شراکت داروں کے ساتھ باہمی تعلقات کو مزید خوشگوار بنائیں۔ ان کا کہنا تھا کہ کراچی میں تعینات امریکی قونصل جنرل نے دونوں دوست ممالک کے درمیان باہمی افہام و تفہیم اور تعاون کو فروغ دینے میں اہم کردار ادا کیا ہے۔