وہ دن دور نہیں جب کشمیری بھائیوں کو حق خود ارادیت ملے گا: سرفراز بگٹی

کوئٹہ، 05 فروری (پی پی آئی) وزیر اعلیٰ بلوچستان میر سرفراز بگٹی نے بدھ کے روز کہا ہے کہ بھارت کے ناجائز مقبوضہ جموں و کشمیر کے عوام بھارتی قبضے کے خلاف جدوجہد کر رہے ہیں اور وہ دن دور نہیں جب کشمیری بھائیوں کو حق خود ارادیت ملے گا۔ یوم یکجہتی کشمیر کے موقع پر وزیراعلیٰ سیکرٹریٹ سے جاری بیان میں انہوں نے کہا کہ خطے میں امن مسئلہ کشمیر کے منصفانہ حل سے ہی ممکن ہے۔ عالمی برادری کی توجہ کشمیریوں کی حالت زار کی طرف مبذول کرواتے ہوئے انہوں نے کہا کہ بھارت نے مقبوضہ جموں و کشمیر کے لوگوں کو ان کے بنیادی انسانی حقوق سے محروم کر رکھا ہے۔ انہوں نے کہا کہ پاکستان کشمیریوں کی حمایت جاری رکھے گا، بلوچستان کے شہری کشمیری بھائیوں کے ساتھ کھڑے ہیں۔ انہوں نے کہا کہ بھارت کے غیر قانونی طور پر مقبوضہ جموں و کشمیر کے عوام کی جانب سے اپنے ناقابل تنسیخ حق خود ارادیت کے لیے دی گئی قربانیاں جلد رنگ لائیں گی۔