کراچی کے شہریوں کو بھی رمضان مقدس میں ریلیف پیکجز دیئے جائیں:پاسبان

کراچی،27فروری (پی پی آئی)پاسبان ڈیموکریٹک پارٹی کے بیان کے مطابق کراچی کے چیف آرگنائزر طارق چاندی والا نے کہا ہے کہ کراچی کے شہریوں کو بھی اسلام آباد کی طرح رمضان میں ریلیف پیکجز دیئے جائیں۔ انہوں نے کہا کہ سستے رمضان بازار اور فیئر پرائس شاپس قائم کی جائیں تاکہ شہری رمضان کی خریداری آسانی سے کر سکیں۔طارق چاندی والا نے اس بات پر زور دیا کہ گراں فروشوں کے خلاف صرف میڈیا کارروائی کافی نہیں، بلکہ ان کے خلاف سخت اقدامات کیے جائیں۔ انہوں نے کہا کہ مہنگائی کی وجہ سے پھل اور گوشت عام آدمی کی قوت خرید میں نہیں رہے۔پاسبان ڈیموکریٹک پارٹی نے کہا کہ پاکستان کا سرکاری نظام مؤثر طریقے سے کام نہیں کر رہا، اور حکومت میں موجود افراد مہنگائی کے مسائل کو نظر انداز کرتے ہیں۔ انہوں نے کہا کہ غریب عوام کے لئے یوٹیلیٹی بلز ادا کرنا یا پیٹ بھرنا مشکل ہو چکا ہے۔چیف آرگنائزر نے مزید کہا کہ کمشنر کراچی کے اقدامات ناکافی ہیں اور شہر بھر میں گوشت، آٹا، مرغی اور پھل سرکاری نرخوں پر دستیاب نہیں ہیں۔ ان کے مطابق، کمشنر کے مقرر کردہ افسران جرمانے کرنے میں زیادہ دلچسپی لیتے ہیں، جبکہ عوام کی شکایات پر توجہ نہیں دی جا رہی۔طارق چاندی والا نے کہا کہ بڑھتی ہوئی مہنگائی کے معاملے پر پیپلز پارٹی حکومت کی کارکردگی ناقص ہے۔ انہوں نے مزید کہا کہ پنجاب اور اسلام آباد کے عوام کو سستی ٹرانسپورٹ اور اشیامیسر ہیں، لیکن سندھ کے عوام بنیادی ضروریات زندگی سے محروم ہیں۔