آئی ٹی ٹریننگ منصوبہ کو تمام صوبوں بشمول آزاد کشمیر اور گلگت بلتستان تک وسعت دینے کا حکم

اسلام آباد،10مارچ (پی پی آئی)وزیراعظم شہباز شریف نے کہا ہے کہ نوجوانوں کو جدید مہارتوں سے لیس کرنے کے لیے حکومت ہر ممکن تعاون فراہم کر رہی ہے۔ آئی سی ٹی ٹریننگ پورٹل  کے ذریعے نوجوانوں کو آن لائن تربیت دی جائے گی۔وزیراعظم آفس سے جاری بیان کے مطابق ہواوے ٹیکنالوجیز کے تحت اب تک 20 ہزار 315 طلبہ کو تربیت فراہم کی جا چکی ہے۔ اس پروگرام کے تحت طلبہ، ٹرینرز اور آئی سی ٹی ٹیکنالوجیز میں کام کرنے والوں کی مہارت میں اضافہ کیا جا رہا ہے۔بیان میں کہا گیا ہے کہ ہواوے ٹیکنالوجیز جن ماسٹر ٹرینرز کو تربیت فراہم کرے گی، وہ مقامی سطح پر نوجوانوں کو مزید تربیت دیں گے۔وزیراعظم نے آئی ٹی ٹریننگ کے منصوبوں پر تیزی سے عمل درآمد یقینی بنانے اور آئی سی ٹی ٹریننگ پورٹل کو زیادہ سے زیادہ لوگوں تک پہنچانے کی ہدایت کی۔انہوں نے اس منصوبے کو تمام صوبوں بشمول آزاد کشمیر اور گلگت بلتستان تک وسعت دینے کا بھی حکم دیا۔اجلاس میں وفاقی وزیر اطلاعات و نشریات عطاء   اللہ تارڑ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیراعظم کے معاون خصوصی ہارون اختر، چیئرمین پی ایم یوتھ پروگرام رانا مشہود احمد خان اور متعلقہ اعلیٰ سرکاری افسران نے شرکت کی۔