یورپی یونین مسئلہ کشمیر کے حل کیلئے نمائندہ مقرر کرے: صدر آزاد کشمیر

اسلام آباد،10مارچ (پی پی آئی)صدر ریاست آزاد جموں و کشمیر بیرسٹر سلطان محمود چوہدری نے کہا ہے کہ یورپی یونین مسئلہ کشمیر کے حل کے لیے اپنا نمائندہ مقرر کرے اور جنوبی ایشیا میں قیام امن کے لیے کردار ادا کرے۔ انہوں نے کہا کہ پاک بھارت دونوں ایٹمی طاقتیں ہیں اور ان کے درمیان کوئی بھی واقعہ ایک بڑی جنگ کا سبب بن سکتا ہے۔صدارتی سیکرٹریٹ، ایوان صدر کشمیر ہاؤس اسلام آباد سے جاری پریس ریلیز کے مطابق، صدر آزاد جموں و کشمیر نے یہ بات آسٹریا کی سفیر اینڈریا وکی سے ملاقات کے دوران کہی۔ انہوں نے کہا کہ یورپی ممالک انفرادی طور پر بھی مسئلہ کشمیر کے حل کے لیے کوششیں کریں، بالخصوص آسٹریا کو اس معاملے میں کردار ادا کرنا چاہیے کیونکہ اس کا انسانی حقوق کے تحفظ کا ایک مضبوط ریکارڈ ہے۔انہوں نے کہا کہ بھارت نے 5 اگست 2019 کے بعد مقبوضہ کشمیر میں انسانی حقوق کی خلاف ورزیوں میں اضافہ کر دیا ہے۔ عالمی برادری کو چاہیے کہ وہ ان خلاف ورزیوں کو رکوانے میں اپنا کردار ادا کرے اور مسئلہ کشمیر کے حل کے لیے اپنی کوششوں کو تیز کرے۔صدر آزاد کشمیر نے کہا کہ جنوبی ایشیا میں دیرپا امن کے قیام کے لیے مسئلہ کشمیر کا حل ناگزیر ہے اور عالمی برادری کو اس تنازع کے حل کے لیے عملی اقدامات اٹھانے چاہییں۔