ڈاکٹر ذاکر نائیک کا گورنر ہاؤس میں افطار میں شرکت، عمرہ ٹکٹ اور رہائشی پلاٹ کی قرعہ اندازی

کراچی(پی پی آئی)معروف اسکالر ڈاکٹر ذاکر نائیک نے گورنر ہاؤس میں منعقدہ ساتویں ”اتحاد رمضان” افطار/ڈنر میں بطور مہمانِ خصوصی شرکت کی، جہاں انہوں نے عمرہ ٹکٹ اور 120 گز کے رہائشی پلاٹ کی قرعہ اندازی کی۔گورنر سندھ کامران خان ٹیسوری نے ڈاکٹر ذاکر نائیک کی آمد کو باعثِ اعزاز قرار دیا اور ان کے گورنر ہاؤس میں قیام پر خوشی کا اظہار کیا۔ انہوں نے بتایا کہ ڈاکٹر ذاکر نائیک نے درخواست پر مقبوضہ کشمیر کے مظلوم مسلمانوں کے لیے خصوصی دعا بھی کی۔افطار میں شہریوں اور مختلف جامعات، بشمول این ای ڈی، حبیب، یو آئی ٹی، کے آئی ای ٹی، اور میٹروپولیٹن یونیورسٹی کے طلبہ نے بڑی تعداد میں شرکت کی۔ گورنر سندھ نے مہمانوں اور طلبہ کا خیر مقدم کیا، ان کے مسائل سنے اور ان سے گھل مل گئے۔ طلبہ نے اس موقع کو یادگار قرار دیا اور کئی شرکاء نے گورنر کے ساتھ سیلفیاں بھی بنوائیں۔خطاب کے دوران، ڈاکٹر ذاکر نائیک نے رمضان کی عبادات کی اہمیت پر زور دیتے ہوئے کہا کہ اس مقدس مہینے میں کیے جانے والے نیک اعمال کا اجر 700 گنا زیادہ ہوتا ہے۔بعد ازاں، ڈاکٹر ذاکر نائیک نے خوش نصیب افراد کے لیے قرعہ اندازی کی۔ عمرہ ٹکٹ محمد شاہد ولد عبدالرشید کے نام نکلا، جنہوں نے اظہارِ مسرت کرتے ہوئے کہا کہ عمرہ کی سعادت ان کی دیرینہ خواہش تھی اور وہ اس موقع کے لیے دعا کر رہے تھے۔ 120 گز کا رہائشی پلاٹ ماریہ آفاق احمد کے نام ہوا، جنہوں نے بتایا کہ وہ کرایے کے گھر کی تلاش میں مشکلات کا سامنا کر رہی تھیں اور اب اللہ کے فضل سے ان کے پاس اپنا پلاٹ موجود ہے۔مزید برآں، دیگر خوش نصیب افراد میں نقد انعامات بھی تقسیم کیے گئے۔