موٹروے پر 150 کلومیٹر سے زائد تیز رفتاری پر 20 گاڑیوں کے خلاف کارروائی

اسلام آباد،11مارچ (پی پی آئی)موٹروے پر 150 کلومیٹر سے زائد رفتار کے خلاف کارروائیاں جاری ہیں۔ ترجمان موٹروے پولیس نے بتایا کہ سنٹرل ریجن میں اب تک 20 گاڑیوں کے خلاف کارروائی کی جا چکی ہے۔ تین رویہ موٹروے پر حد رفتار 120 کلومیٹر فی گھنٹہ ہے جبکہ پبلک گاڑیوں کے لئے یہ حد 110 کلومیٹر فی گھنٹہ مقرر کی گئی ہے۔ترجمان نے مزید کہا کہ ایف آئی آر اور گرفتاریوں کا مقصد حادثات سے بچاؤ کو یقینی بنانا ہے۔ موٹروے پولیس کا کہنا ہے کہ تیز رفتاری سے نہ صرف ڈرائیورز بلکہ دیگر مسافروں کی جانوں کو بھی خطرہ لاحق ہوتا ہے، اس لئے قانون کی سختی سے عمل درآمد کروایا جا رہا ہے۔ ترجمان نے عوام سے اپیل کی کہ وہ مقررہ رفتار کا خیال رکھیں تاکہ حادثات سے بچا جا سکے۔