ہولی بہار کی نوید اور رنگوں کا جشن، خوشی اور امن کا پیغام عام کرتا ہے:وزیراعلیٰ سندھ

کراچی،13مارچ (پی پی آئی)وزیراعلیٰ سندھ سید مراد علی شاہ نے ہندو برادری کو ہولی کی مبارکباد پیش کرتے ہوئے کہا کہ سندھ دھرتی ہمیشہ محبت، رواداری اور ہم آہنگی کی علامت رہی ہے۔وزیراعلیٰ نے کہا کہ ہولی بہار کی نوید اور رنگوں کا جشن ہے، جو خوشی اور امن کا پیغام عام کرتا ہے۔ انہوں نے زور دیا کہ سندھ میں ہولی کا تہوار بھائی چارے اور ہم آہنگی کے جذبے کے ساتھ منایا جاتا ہے۔مراد علی شاہ نے کہا کہ ہولی صرف رنگوں کا نہیں، بلکہ خوشیوں، امن اور بھائی چارے کا حسین تہوار ہے۔ انہوں نے کہا کہ ہولی کا پیغام محبت، یکجہتی اور باہمی احترام پر مبنی ہے اور ہمیں ان اقدار کو فروغ دینا چاہیے۔انہوں نے مزید کہا کہ تمام مذاہب کے تہوار یکجہتی، برداشت اور بھائی چارے کی علامت ہیں۔ وزیراعلیٰ نے کہا کہ سندھ ہمیشہ بین المذاہب ہم آہنگی اور محبت کا گہوارہ رہا ہے۔یہ خیالات وزیراعلیٰ نے ہولی کے موقع پر جاری کردہ اپنے پیغام میں ظاہر کیے۔ انہوں نے تمام برادریوں کو تہوار کی اہمیت اور اس کے پیغام کو سمجھنے کی دعوت دی۔