گردے کے مریضوں کے علاج کیلئے ہر ممکن اقدامات کر ر ہے ہیں: سید مراد علی شاہ

کراچی،13مارچ (پی پی آئی)سندھ کے وزیراعلیٰ سید مراد علی شاہ نے ورلڈ کڈنی ڈے کے موقع پر گردوں کی بیماری سے بچاؤ کے لیے احتیاطی تدابیر اپنانے کی اہمیت پر زور دیا  ہے۔وزیراعلیٰ نے کہا کہ سندھ حکومت گردوں کے مریضوں کے علاج کے لیے ہر ممکن اقدامات کر رہی ہے۔ ان کا کہنا تھا کہ ایس آئی یو ٹی کراچی کے بعد سکھر میں جدید سہولیات سے آراستہ مرکز قائم کر دیا گیا ہے، جس سے گردوں کے مریضوں کو ان کے اپنے شہر میں علاج کی سہولت ملی ہے۔انہوں نے مزید کہا کہ مفت ڈائلیسز سینٹرز کا دائرہ مزید بڑھایا جا رہا ہے تاکہ زیادہ سے زیادہ مریض اس سے مستفید ہو سکیں۔ سید مراد علی شاہ نے کہا کہ گردوں کی بیماری کی بروقت تشخیص سے پیچیدگیوں سے بچا جا سکتا ہے۔وزیراعلیٰ نے صحتمند طرز زندگی اپنانے، زیادہ پانی پینے اور گردوں کو محفوظ رکھنے کی تاکید کی۔ انہوں نے کہا کہ ورلڈ کڈنی ڈے پر عوام کو آگاہی دینا ہماری ذمہ داری ہے تاکہ گردوں کی بیماری سے بچا جا سکے۔