مسئلہ کشمیر کو بین الاقوامی سطح پر مزید اجاگر کرنے کی ضرورت ہے: بیرسٹر سلطان محمود چوہدری

باغ،25مارچ (پی پی آئی) صدر آزاد جموں و کشمیر بیرسٹر سلطان محمود چوہدری نے مسئلہ کشمیر کو بین الاقوامی سطح پر مزید اجاگر کرنے کی ضرورت پر زور دیا ہے۔ انہوں نے کہا کہ انہوں نے برطانیہ اور امریکہ کا دورہ کر کے عالمی برادری کو باور کرایا کہ مسئلہ کشمیر کے حل کے بغیر برصغیر میں امن ممکن نہیں۔صدر آزاد کشمیر نے کہا کہ بھارتی وزیر اعظم نریندر مودی کو بے نقاب کرنے کے لئے عالمی ضمیر کو جھنجوڑنے کا یہ بہترین وقت ہے۔ انہوں نے بین الاقوامی برادری سے مطالبہ کیا کہ وہ بھارت کی دہشت گردانہ کارروائیوں اور مقبوضہ کشمیر میں انسانی حقوق کی پامالیوں کا نوٹس لے۔باغ میں ایک افطار ڈنر کے موقع پر خطاب کرتے ہوئے، صدر آزاد کشمیر نے کہا کہ ان کا بیرون ملک دورہ مسئلہ کشمیر پر عالمی توجہ مبذول کرانے کے لئے تھا۔ انہوں نے اس موقع پر باغ کے مسائل کے حل کے لئے اپنے عزم کا اعادہ کیا۔افطار ڈنر کی میزبانی سید اشفاق گردیزی نے کی جبکہ صدارت وزیر زراعت سردار میر اکبر نے کی۔ اس موقع پر صدر کے اعزاز میں پھولوں کے ہار پہنائے گئے اور ان کے حق میں نعرے بازی کی گئی۔