پاکستانی معیشت 1.73% نمو کے ساتھ توقعات سے زیادہ، بلوم برگ

اسلام آباد،26مارچ (پی پی آئی)پاکستان کی معیشت نے پچھلے سال کی آخری سہ ماہی میں غیر متوقع نمو کا مظاہرہ کیا، بلومبرگ کی رپورٹ میں بتایا گیا ہے کہ معیشت کو شرح سود میں کمی اور بین الاقوامی مالیاتی فنڈ سے فائدہ ہوا۔بلومبرگ نے پاکستان کے ادارہ شماریات کی تازہ ترین رپورٹ کا حوالہ دیتے ہوئے بتایا کہ دسمبر میں ختم ہونے والے سال کے تین مہینوں میں مجموعی ملکی پیداوار (جی ڈی پی) میں 1.73 فیصد اضافہ ہوا۔ یہ نمو بلومبرگ کے سروے کردہ ماہرین اقتصادیات کی پیش گوئی کردہ 1.5 فیصد سے زیادہ تھی۔رپورٹ میں اس بات پر روشنی ڈالی گئی کہ معیشت نے حال ہی میں استحکام حاصل کیا ہے، جبکہ آئی ایم ایف کے فنڈز جنوبی ایشیائی ملک کی معاونت کر رہے ہیں۔ مزید برآں، پاکستان کے حکام نے آئی ایم ایف کے ساتھ 2.3 ارب ڈالر کے قرضوں کے حصول کے لئے اسٹاف لیول معاہدہ کر لیا ہے۔ افراط زر میں کمی نے اسٹیٹ بینک آف پاکستان کو بینچ مارک ریٹس کم کرنے میں مدد دی۔ مرکزی بینک نے جون 2025 کو ختم ہونے والے سال کے لئے 2.5 سے 3.5 فیصد کی پیش گوئی کی ہے۔ادارہ شماریات کے اعداد و شمار یہ بھی ظاہر کرتے ہیں کہ دسمبر میں ختم ہونے والے تین مہینوں کے دوران زرعی شعبے میں 1.1 فیصد اضافہ ہوا، جو پچھلی سہ ماہی کے 0.74 فیصد کے مقابلے میں زیادہ ہے۔ خدمات کے شعبے میں 2.57 فیصد اضافہ دیکھا گیا ہے۔