بلوچستان کے حکمرانوں میں حالات کو کنٹرول کرنے کی صلاحیت نہیں ہے:ترجمان جے یو آئی

کوئٹہ،22مارچ (پی پی آئی) جمعیت علمائے اسلام (جے یو آئی) کے ترجمان اسلم غوری نے کوئٹہ کی موجودہ صورتحال پر تشویش کا اظہار کرتے ہوئے کہا ہے کہ ریاست کو اپنے شہریوں کے ساتھ نرم رویہ اپنانا چاہئے۔ ان کا کہنا تھا کہ بلوچستان کے حکمرانوں میں حالات کو کنٹرول کرنے کی صلاحیت نہیں ہے۔ترجمان جے یو آئی نے مظاہرین کے جائز مطالبات تسلیم کرنے کی ضرورت پر زور دیتے ہوئے کہا کہ اپنی قوم کے بچوں بچیوں پر تشدد کسی صورت قبول نہیں کیا جا سکتا۔اسلم غوری نے مزید کہا کہ جبر و تشدد سے مسائل کو دبایا نہیں جا سکتا اور اس سے صورتحال مزید بگڑ سکتی ہے۔ جے یو آئی نے حکومت سے مطالبہ کیا ہے کہ وہ عوامی مسائل کو حل کرنے کے لیے فوری اقدامات کرے۔