بلوچستان میں شٹر ڈاؤن ہڑتال، اہم شاہراہوں پر پہیہ جام، کاروباری مراکز اور دکانیں بند

کوئٹہ،22مارچ (پی پی آئی) بلوچ یکجہتی کمیٹی (بی وائی سی) کی کال پر ہفتہ کو بلوچستان کے مختلف علاقوں میں شٹر ڈاؤن ہڑتال کی گئی۔ صوبے کی اہم شاہراہوں پر پہیہ جام بھی رہا جبکہ کاروباری مراکز اور دکانیں بند رہیں۔بلوچ یکجہتی کمیٹی نے کوئٹہ، مستونگ، سوراب، قلات، وڈھ، خضدار، نوشکی، چاغی اور نصیر آباد سمیت مختلف شہروں میں شٹر ڈاؤن ہڑتال کی کال دی تھی۔ اس دوران مظاہرین نے صوبے کی اہم شاہراہیں ٹریفک کے لیے بند کر دیں۔جمعہ کو بی وائی سی کے رکن بیبرگ بلوچ کی گرفتاری کے خلاف احتجاجی ریلی نکالی گئی جس کے بعد جھڑپ شروع ہو گئی۔ بی وائی سی نے دعویٰ کیا کہ پولیس کی فائرنگ سے تین افراد ہلاک اور درجنوں زخمی ہوئے۔ تاہم پولیس نے ان دعوؤں کو مسترد کر دیا۔کوئٹہ میں پولیس اور مظاہرین کے درمیان تصادم کے بعد حالات کشیدہ ہیں۔ موبائل سروس بھی معطل رہی۔ بی وائی سی کے چیئرمین نے سریاب روڈ پر لاشوں کے ساتھ احتجاجی دھرنا شروع کیا۔ بی وائی سی کی رہنما صبیحہ بلوچ نے کہا کہ پولیس نے ہفتے کی صبح دھرنا کیمپ میں موجود دیگر رہنماؤں کو حراست میں لے کر کریک ڈاؤن شروع کیا۔