اختر مینگل کو شاہوانی سٹیڈیم پر دھرنے کی پیشکش، ریڈ زون ایریا میں اجازت نہیں

کوئٹہ،05اپریل (پی پی آئی) صوبائی حکومت کے ترجمان شاہد رند نے کہا ہے کہ بلوچستان میں دفعہ 144 نافذ العمل ہے اور اس کی خلاف ورزی کرنے والوں کے خلاف کارروائی کی جائے گی۔ شاہد رند نے پریس کانفرنس کے دوران واضح کیا کہ کسی حکومتی وفد نے ڈسٹرکٹ جیل کوئٹہ میں بلوچ یکجہتی کمیٹی کے رہنما ڈاکٹر مہرنگ بلوچ سے ملاقات نہیں کی ہے۔ انہوں نے کہا کہ بلوچستان نیشنل پارٹی کے سربراہ سردار اختر جان مینگل کو شاہوانی سٹیڈیم سریاب روڈ پر دھرنا دینے کی پیشکش کی گئی تھی، تاہم وہ ریڈ زون ایریا میں دھرنا دینے پر اڑے رہے۔ ترجمان نے مزید کہا کہ موجودہ سیکیورٹی صورتحال کو مدنظر رکھتے ہوئے ریڈ زون ایریا میں دھرنے کی اجازت نہیں دی جائے گی۔ حکومت اور بلوچستان نیشنل پارٹی کے درمیان مذاکرات کے دو دور ناکام رہے ہیں، جبکہ حکومت تحمل کا مظاہرہ کر رہی ہے۔ اختر جان مینگل نے بلوچ یکجہتی کمیٹی کے زیر حراست رہنما ڈاکٹر مہرنگ بلوچ سمیت دیگر افراد کی رہائی کا مطالبہ کیا ہے۔ ترجمان نے مزید کہا کہ لکپاس میں بلوچستان نیشنل پارٹی کے احتجاجی دھرنے میں ریاست مخالف بیانات دیئے گئے، جن کے خلاف سخت کارروائی کی جائے گی۔