زرعی یونیورسٹی ٹنڈو جام میں پلانٹ پروٹیکشن سائنسز پربین الاقوامی کانفرنس آج شروع ہوگی

حیدر آباد،07اپریل (پی پی آئی)سندھ زرعی یونیورسٹی ٹنڈو جام میں پلانٹ پروٹیکشن سائنسز پر دوسری بین الاقوامی کانفرنس کل بدھ سے شروع ہوگی، جس میں ملکی و عالمی ماہرین اپنے تحقیقی مقالے پیش کریں گے۔ اس کانفرنس کا مقصد فصلوں کے تحفظ کے لیے جدید اور پائیدار طریقوں پر تبادلہ خیال کرنا ہے۔کانفرنس کا انعقاد فیکلٹی آف کراپ پروٹیکشن کے زیرِ اہتمام کیا جا رہا ہے، جس کیلئے سندھ ہایئر ایجوکیشن کمیشن نے تعاون کیا ہے۔ اس ایونٹ کا بنیادی مقصد پاکستان اور ترقی یافتہ ممالک کے درمیان سائنس اور ٹیکنالوجی کے شعبے میں تعاون کو فروغ دینا ہے۔پروگرام کے افتتاحی سیشن کی صدارت سندھ زرعی یونیورسٹی کے وائس چانسلر پروفیسر ڈاکٹر الطاف علی سیال کریں گے۔ چین، آذربائیجان، قازقستان، ملائیشیا اور پاکستان کے معروف کلیدی مقررین کانفرنس سے خطاب کریں گے، جن میں نمایاں شخصیات شامل ہیں۔ماہرین فصلوں کی بیماریوں، کیڑوں کے تدارک، ماحولیاتی تحفظ، اور جڑی بوٹیوں کے کنٹرول جیسے موضوعات پر اپنے تحقیقی مقالے پیش کریں گے۔ کانفرنس کی تکنیکی نشستوں میں موسمیاتی تبدیلی کے اثرات اور دیگر جدید موضوعات پر بھی بحث کی جائے گی۔یہ دو روزہ کانفرنس پاکستان کے زرعی شعبے میں جدیدیت اور غذائی تحفظ کے فروغ میں اہم کردار ادا کرے گی۔ اس سے محققین، نوجوان سائنسدانوں اور طلبہ کی استعداد بڑھانے کے لیے معلومات کے تبادلے اور طویل مدتی اشتراک کے مواقع فراہم ہوں گے۔