کراچی میں ٹریفک اور جرائم سے نمٹنے کے لیے عملی اقدامات کا عزم

کراچی، 14اپریل (پی پی آئی) ایڈیشنل آئی جی کراچی جاوید عالم اوڈھو نے افسران کو ہدایت کی کہ ٹریفک قوانین سے متعلق عوامی آگاہی مہم کو تیز کیا جائے تاکہ شہریوں میں قانون کی پاسداری کے بارے میں شعور اجاگر کیا جا سکے۔آج کراچی پولیس آفس میں ٹریفک مینجمنٹ اور جرائم کی روک تھام کے حوالے سے اعلیٰ سطح اجلاس کی صدارت کرتے ہوئے انہوں نے کہا کہ شہریوں کے تحفظ کو یقینی بنانا اور امن و امان برقرار رکھنا پولیس کی اولین ترجیحات میں شامل ہے اور اس مقصد کے حصول کے لیے تمام دستیاب وسائل بروئے کار لائے جائیں گے۔ اجلاس میں زونل ڈی آئی جیز، ڈی آئی جی ٹریفک، ڈی آئی جی سی آئی اے، ڈی آئی جی انویسٹی گیشن اور دیگر افسران نے شرکت کی۔ اجلاس میں شہر میں ٹریفک قوانین کی بڑھتی ہوئی خلاف ورزیوں، روڈ حادثات اور ان کی وجوہات کا تفصیلی جائزہ لیا گیا۔ پولیس چیف نے افسران کو ہدایت کی کہ فینسی نمبر پلیٹس، غیر قانونی ایمرجنسی لائٹس اور ٹینٹ شیشوں والی گاڑیوں کے خلاف موثر قانونی کارروائی عمل میں لائی جائے۔اجلاس کے دوران کراچی میں اسٹریٹ کرائم، ڈکیتی، چوری اور دیگر سنگین جرائم کی موجودہ صورتحال کا بھی تفصیلی جائزہ لیا گیا۔ ایڈیشنل آئی جی نے متعلقہ افسران کو ہدایت کی کہ جرائم پیشہ عناصر کے خلاف انٹیلی جنس کی بنیاد پر کارروائیاں تیز کی جائیں۔