حب چوکی میں صحافیوں کی ریکی میں ملوث دہشتگرد لیاری سے گرفتار

کراچی،22اپریل (پی پی آئی)پاکستان رینجرز (سندھ) اور سی ٹی ڈی پولیس نے مشترکہ انٹیلی جنس آپریشن کے ذریعے لیاری کے علاقے سے بلوچ لیبریشن فرنٹ سے منسلک ایک انتہائی مطلوب ملزم کو گرفتار کر لیا۔ ملزم اختر عرف اکو عرف بنگالی کو دہشت گردی کی متعدد کارروائیوں میں ملوث ہونے کے الزام میں گرفتار کیا گیا، اور اس کے قبضے سے اسلحہ اور ایمونیشن بھی برآمد ہوا۔ملزم اختر، محلہ سر گواد لیاری کے رہائشی ہیں، اور 2019 میں فراز عرف گنج کے کہنے پر بی ایل ایف میں شامل ہوئے۔ ملزم نے اپنے ساتھی کے ساتھ مل کر حساس مقامات کی ریکی اور ویڈیوز بنانے کا اعتراف کیا ہے۔اس دوران تفتیش، ملزم نے انکشاف کیا کہ وہ 9 مارچ 2021 کو تھانہ بغدادی کے علاقے میں چائنیز نیشنل کی گاڑی پر فائرنگ میں ملوث تھا۔ اس حملے میں چائنیز نیشنل منیجر جیسن اور را بگیر خالد زخمی ہوئے تھے، اور ان کی ایف آئی آر تھانہ بغدادی میں درج ہے۔ملزم نے یہ بھی انکشاف کیا کہ وہ حب چوکی میں صحافیوں کی ریکی میں ملوث تھا۔ 10 اکتوبر 2021 کو بی ایل ایف کے دہشت گردوں نے حب چوکی میں شاہد زہری کی گاڑی پر مقناطیسی بم نصب کر کے دھماکہ کیا، جس سے شاہد زہری جاں بحق ہوئے۔گرفتاری کے بعد، ملزم کو مزید قانونی کارروائی کے لیے سی ٹی ڈی پولیس کے حوالے کر دیا گیا ہے۔ عوام سے اپیل کی گئی ہے کہ جرائم پیشہ عناصر کی معلومات فوری طور پر رینجرز سے شیئر کریں، اور آپ کی شناخت کو خفیہ رکھا جائے گا۔