اسسٹنٹ کمشنرز کے لئے 138 ڈبل کیبن گاڑیوں کی خریداری سپریم کورٹ میں چیلنج

کراچی،23اپریل (پی پی آئی) جماعت اسلامی کے رکن سندھ اسمبلی محمد فاروق نے سندھ ہائی کورٹ کے فیصلے کے خلاف سپریم کورٹ میں اپیل دائر کردی ہے۔ سندھ ہائی کورٹ نے 28 مارچ کو اس معاملے پر دائر درخواست کو مسترد کیا تھا۔ محمد فاروق نے حکومت سندھ کی جانب سے بیوروکریسی کے لیے 138 ڈبل کیبن گاڑیوں کی خریداری کو چیلنج کرتے ہوئے کہا ہے کہ ان گاڑیوں کی خریداری پر تقریباً 2 ارب روپے کے اخراجات آئیں گے، جو عوام کے ادا کردہ ٹیکسوں کی مد سے پورے کیے جائیں گے۔جماعت اسلامی کے میڈیا سیل کے مطابق، محمد فاروق نے کہا کہ اس سلسلے میں گزشتہ تین ستمبر کو نوٹیفکیشن جاری کیا جا چکا ہے، لیکن ان کا مطالبہ ہے کہ اسے غیر قانونی قرار دیا جائے اور نوٹیفکیشن پر عملدرآمد کو عدالتی فیصلے تک معطل کیا جائے۔انہوں نے مزید کہا کہ ملک میں مہنگائی کی شرح 28 فیصد سے زیادہ ہے اور صوبے میں عوام کو صحت اور تعلیم کی بنیادی سہولیات میسر نہیں ہیں۔ محمد فاروق نے دعویٰ کیا ہے کہ عوام کے ٹیکس کے پیسے کو عوام کی بہبود کے لیے استعمال کیا جانا چاہیے اور بیوروکریسی کے لیے گاڑیوں کی خریداری سے عوام کا کوئی فائدہ نہیں ہے۔انہوں نے الزام عائد کیا کہ اختیارات کا غلط اور عوامی پیسے کا بیجا استعمال کیا جا رہا ہے۔