کامیاب شٹر ڈاؤن ہڑتال سے حکمرانوں کو وارننگ: منعم ظفر خان

کراچی،26اپریل (پی پی آئی) امیر جماعت اسلامی کراچی منعم ظفر خان نے کراچی سے چترال تک ملک گیر شٹر ڈاؤن ہڑتال کو حکمرانوں کے لیے واضح پیغام قرار دیا ہے کہ وہ قبلہ اول کی آزادی کے لیے عملی اقدامات کریں۔ انہوں نے کہا کہ کراچی سمیت پورے ملک کے تاجروں، مختلف طبقات اور سول سوسائٹی نے ثابت کر دیا ہے کہ وہ اہل غزہ کے ساتھ ہیں۔ریگل چوک صدر میں پریس کانفرنس سے خطاب کرتے ہوئے منعم ظفر خان نے کاروباری طبقے کو خراج تحسین پیش کیا اور ان کی کاوشوں پر اظہار تشکر کیا۔ اس موقع پر مختلف تجارتی تنظیموں کے رہنما بھی موجود تھے۔منعم ظفر خان نے کہا کہ آج پورا ملک اہل غزہ و فلسطین کے ساتھ کھڑا ہے۔ شہر کی تمام مارکیٹیں، کاروباری مراکز اور پیٹرول پمپ بند ہیں۔ انہوں نے حکمرانوں کو ہوش کے ناخن لینے اور نوشتہ دیوار پڑھنے کی تلقین کی۔انہوں نے مزید کہا کہ فلسطین میں اسرائیلی دہشت گردی جاری ہے اور بھارت نے پاکستان کے خلاف آبی جارحیت کا آغاز کر دیا ہے۔ انہوں نے بھارت، اسرائیل اور امریکہ کو مسلمانوں کے خلاف گٹھ جوڑ کرنے والا شیطانی مثلث قرار دیا۔منعم ظفر خان نے امت مسلمہ کے حکمرانوں کو خبردار کیا کہ اگر وہ جاگے نہیں تو عوام انہیں مسترد کر دیں گے۔ انہوں نے ارض فلسطین اور اہل غزہ کے ساتھ یکجہتی کا اعادہ کیا اور عالمی انسانی حقوق کے اداروں کی خاموشی پر سوال اٹھایا۔انہوں نے مسلم دنیا کے حکمرانوں کو غزہ میں جاری ظلم کو روکنے کے لیے عملی اقدامات کرنے کی تلقین کی۔