بھارت کی جانب سے سندھ طاس معاہدے کی معطلی بچگانہ عمل ہے: ہمایوں اختر خان

لاہور،27اپریل (پی پی آئی)سابق وفاقی وزیر ہمایوں اختر خان نے بھارت کی جانب سے سندھ طاس معاہدے کی معطلی کو بچگانہ عمل قرار دیا ہے۔ ہمایوں اختر خان نے کہا کہ پاکستانی افواج ملکی سلامتی کے دفاع کے لیے ہر لمحہ تیار ہیں اور قوم اپنی افواج کے شانہ بشانہ ہے۔ہمایوں اختر خان نے حلقہ این اے 97 کے عمائدین کے وفد سے ملاقات کے دوران کہا کہ پہلگام واقعہ پر بغیر تحقیقات کے پاکستان پر الزامات عائد کرنا اور عجلت میں یکطرفہ اقدامات اٹھانا بھارت کے کردار پر سوالیہ نشان اٹھاتے ہیں۔ انہوں نے کہا کہ بھارت کی منفی سوچ سے علاقائی امن و استحکام کو شدید خطرہ لاحق ہو سکتا ہے۔ عالمی گارنٹیز کے ساتھ ہونے والے معاہدے یکطرفہ طور پر معطل نہیں کیے جا سکتے، اور بھارت کی جانب سے سندھ طاس معاہدے کی معطلی خطے کے امن کو خطرے میں ڈالنے کے مترادف ہے۔ہمایوں اختر خان نے وفد کو حلقے میں ترقیاتی منصوبوں کے حوالے سے اپنی کاوشوں سے بھی آگاہ کیا۔ انہوں نے یقین دلایا کہ حلقے کے مسائل کو بتدریج حل کرنے کے ساتھ اس کی تعمیر و ترقی کے لیے اپنی کاوشیں جاری رکھیں گے۔