مقبوضہ کشمیر اس وقت دنیا کی سب سے بڑی اوپن ایئر جیل بن چکا ہے: طاہر کھوکھر

مظفرآباد،27اپریل (پی پی آئی)پاسبان وطن پاکستان کے مرکزی صدر طاہر کھوکھر نے کہا ہے کہ  مقبوضہ کشمیر اس وقت دنیا کی سب سے بڑی اوپن ایئر جیل بن چکا ہے اور بھارت میں ظلم کی سیاہ رات اب اپنے انجام کے قریب ہے۔ انہوں نے کشمیریوں کی قربانیوں کے جلد رنگ لانے کا عندیہ دیا۔طاہر کھوکھر کا کہنا تھا کہ بھارت میں مسلمانوں اور دیگر اقلیتوں کے خلاف سازشیں کی جا رہی ہیں اور مقبوضہ کشمیر میں جاری بھارتی ریاستی دہشت گردی اب دنیا سے چھپی نہیں رہی۔ انہوں نے کہا کہ ہندو انتہاپسندی کو ریاستی سرپرستی حاصل ہے اور وقف بورڈ بل جیسے اقدامات کے ذریعے مسلمانوں کی زمینیں چھینی جا رہی ہیں۔انہوں نے بھارتی حکومت پر الزام عائد کیا کہ نہتے کشمیریوں پر ظلم ڈھایا جا رہا ہے اور ہزاروں نوجوانوں کو بے جرم جیلوں میں قید کیا گیا ہے۔ فیک مقابلوں اور محاصروں کے ذریعے کشمیری عوام کو دہشت زدہ کرنے کی کوشش جاری ہے۔طاہر کھوکھر نے حالیہ دنوں پہلگام میں کشمیریوں کی گرفتاری کی مذمت کرتے ہوئے کہا کہ بھارتی فوج کشمیری نوجوانوں کو جبری طور پر لاپتا کر رہی ہے اور جھوٹے مقدمات کے ذریعے قید میں رکھا جا رہا ہے۔انہوں نے اقوام متحدہ اور او آئی سی پر تنقید کرتے ہوئے کہا کہ یہ ادارے اپنی ذمہ داریاں نبھانے میں ناکام ہیں۔ طاہر کھوکھر نے بھارت کی مکاری کو بے نقاب کرتے ہوئے کہا کہ حالیہ فالس فلیگ آپریشن کے ذریعے معصوم سیاحوں کو نشانہ بنایا گیا تاکہ عالمی برادری کی توجہ ہٹائی جا سکے۔آخر میں، طاہر کھوکھر نے کہا کہ کشمیری قوم کی قربانیاں رائیگاں نہیں جائیں گی اور آزادی کا خواب جلد شرمندہ تعبیر ہوگا۔