سندھ میں ٹریفک قوانین کی خلاف ورزیوں کے خلاف کارروائی تیز، ہزاروں گاڑیاں ضبط

کراچی، 28 اپریل (پی پی آ ئی)سندھ حکومت نے ٹریفک قوانین کی خلاف ورزیوں کے خلاف اپنی مہم کو مزید تیز کرتے ہوئے اب تک 25,625 موٹر سائیکلیں اور 278 گاڑیاں ضبط کرلی ہیں جبکہ 278 ڈرائیورز کو گرفتار بھی کیا گیا ہے تاکہ سڑکوں پر قانون کی حکمرانی اور حفاظت کو یقینی بنایا جا سکے۔سینئر صوبائی وزیر اطلاعات، ٹرانسپورٹ اور ماس ٹرانزٹ، شرجیل انعام میمن نے بتایا کہ 16 اپریل سے 28 اپریل کے دوران ماڈل سڑکوں پر کارروائی کرتے ہوئے دفعہ 188 کے تحت 99 ایف آئی آرز، تیز رفتاری اور لاپرواہی سے ڈرائیونگ پر دفعہ 279 کے تحت ایک مقدمہ، اور دفعہ 341 کے تحت 21 مقدمات درج کیے گئے۔ اس دوران 13 غیر رجسٹرڈ چنگچی گاڑیاں ضبط کی گئیں، 27 ایل پی جی/سی این جی کٹس قبضے میں لی گئیں اور 4,119 چالان جاری کیے گئے۔انہوں نے مزید بتایا کہ ہیوی اور لائٹ ٹرانسپورٹ گاڑیوں کے خلاف بھی سخت کارروائی کی گئی جس کے نتیجے میں 416 گاڑیاں ضبط کی گئیں۔ 25 گاڑیوں کی رجسٹریشن منسوخ کرنے کی سفارش کی گئی جبکہ 380 گاڑیوں کو تکنیکی بہتری اور فٹنس کی تجدید کے بعد مشروط طور پر چھوڑا گیا۔شرجیل انعام میمن نے واضح کیا کہ یہ کارروائی کسی ایک وقتی مہم کا حصہ نہیں بلکہ ایک جامع اصلاحاتی عمل ہے جو بلاامتیاز جاری رہے گا تاکہ سڑکوں کو محفوظ اور قانون کا پابند بنایا جا سکے۔انہوں نے مزید کہا کہ غیر قانونی رکشوں، غیر رجسٹرڈ گاڑیوں اور ناقص سی این جی/ایل پی جی کٹس کے خلاف بھی موثر مہم جاری ہے۔ انہوں نے شہریوں، ڈرائیورز اور ٹرانسپورٹرز پر زور دیا کہ وہ قوانین کی پاسداری کو یقینی بنائیں کیونکہ عوامی تعاون کے بغیر پائیدار بہتری ممکن نہیں۔