پاکستان اور چیک جمہوریہ کے درمیان ٹیکنالوجی میں تعاون بڑھانے پر اتفاق

اسلام آباد،29اپریل (پی پی آئی) وفاقی وزیر برائے سائنس و ٹیکنالوجی خالد حسین مگسی نے جمہوریہ چیک کے اعلیٰ سطح وفد کے ساتھ ملاقات میں سائنس اور ٹیکنالوجی میں دو طرفہ تعاون کو بڑھانے پراتفاق کیا۔ چیک سفیر کی جانب سے پاکستانی طلباء کے لئے ابھرتی ہوئی ٹیکنالوجیز میں اسکالرشپس کی پیش کش تعلیمی اور تحقیقی روابط کو مضبوط بنانے کی جانب ایک اہم قدم ہے۔وزیر خالد حسین مگسی نے عالمی انوویشن انڈیکس میں پاکستان کی بہتر ہوتی پوزیشن کو سراہا اور اسے ایک تعمیری پیشرفت قرار دیا۔وفاقی وزیر نے سائنس اور ٹیکنالوجی میں پاکستان کی انسانی وسائل کی ترقی کو بڑھانے کے لیے مزید اقدامات کی ضرورت پر زور دیا تاکہ عالمی سطح پر مزید پہچان حاصل کی جا سکے۔  خالد حسین مگسی نے نوجوان سائنسدانوں اور تکنیکی ماہرین کی صلاحیتوں کو بڑھانے میں چیک جمہوریہ کے تعاون پر اظہار تشکر کیا۔ اس تعاون سے دونوں ممالک کے درمیان سائنس، ٹیکنالوجی اور انوویشن کے شعبوں میں نئے مواقع پیدا ہونے کی توقع ہے۔