نظام مصطفی پارٹی نے فلسطین کے لیے پرامن ملین مارچ کی حمایت کردی

کراچی،3 مئی (پی پی آئی)نظام مصطفی پارٹی نے فلسطین کے لیے پرامن ملین مارچ کی حمایت کا اعلان کرتے ہوئے اسے وقت کی اہم ضرورت قرار دیا ہے۔ پارٹی کے چیئرمین ڈاکٹر حاجی محمد حنیف طیب، صدر میاں خالد حبیب الٰہی ایڈووکیٹ، اور جنرل سیکریٹری پروفیسر عبدالجبار قریشی نے پارٹی کے دیگر رہنماؤں کے ساتھ مل کر اس مارچ کی حمایت کی ہے۔ ان کا کہنا ہے کہ مسلم حکمرانوں نے غزہ کے معاملے پر عملی اتحاد کا مظاہرہ نہیں کیا ہے۔رہنماؤں نے 57 اسلامی ممالک کی تنظیم او آئی سی پر تنقید کرتے ہوئے کہا کہ اس نے خود کو صرف مذمتی قراردادوں تک محدود کر رکھا ہے جبکہ غزہ میں تاریخ کے سب سے بڑے قتل عام پر خاموشی اختیار کی ہوئی ہے۔رہنماؤں کا یہ بھی کہنا تھا کہ اسلام دشمن قوتیں متحد ہیں جبکہ مسلم ممالک کے حکمران تقسیم ہیں۔ انہوں نے کہا کہ اسرائیلی، امریکی گٹھ جوڑ سے فلسطین میں مظالم جاری ہیں اور بھارت اسرائیل گٹھ جوڑ پاکستان کو جنگ کی طرف دھکیل رہا ہے۔رہنماؤں نے کہا کہ پرامن ملین مارچ مسلم حکمرانوں کے ضمیر کو جھنجوڑنے اور مسلمانوں کو یکجا کرنے کے لیے کیا جا رہا ہے۔ عوام الناس سے اپیل کی گئی ہے کہ وہ اتوار، 4 مئی، بعد نماز ظہر نورانی چورنگی سے تبت سینٹر تک مارچ میں شرکت کر کے ملی یکجہتی اور فلسطینی عوام سے محبت کا ثبوت دیں۔