روٹری نے دنیا بھر میں امید اور خدمت کا نیٹ ورک قائم کیا ہے:چیئرمین سینیٹ

کراچی،3 مئی (پی پی آئی) چیئرمین سینیٹ سید یوسف رضا گیلانی اور گورنر سندھ کاران خان ٹیسوری نے روٹری انٹرنیشنل ڈسٹرکٹ کانفرنس 2025 میں شرکت کی۔ انہوں نے انسانی خدمت، صحت، نوجوانوں کے حقوق، اور پولیو کے خاتمے میں روٹری انٹرنیشنل کی خدمات کو سراہا۔گیلانی نے روٹری انٹرنیشنل کے ڈسٹرکٹ گورنر رضوان ادھیا کی قیادت کو سراہا اور کہا کہ روٹری کا ورثہ خدمت اور معاشرتی تعمیر پر مبنی ہے۔ انہوں نے روٹری کے اصول ‘خدمت کو خود پر ترجیح’ کی تعریف کی۔چیئرمین سینیٹ نے مختلف شعبوں میں روٹری کی خدمات کا تذکرہ کرتے ہوئے کہا، “روٹری نے دنیا بھر میں امید اور خدمت کا نیٹ ورک قائم کیا ہے۔” انہوں نے روٹری کے منصوبوں کو پاکستان کے ترقیاتی اہداف سے ہم آہنگ قرار دیا۔انہوں نے کہا کہ سینیٹ کی سطح پر قانون سازی کے ذریعے شمولیتی ترقی اور ماحولیاتی تحفظ کو فروغ دیا جائے گا۔ انہوں نے روٹری کے لیڈر شپ پروگرامز کی بھی تعریف کی۔علاقائی امن پر بات کرتے ہوئے گیلانی نے بھارت پر تنقید کی اور کہا کہ پاکستان پْرامن ملک ہے اور غیر جانبدار تحقیقات کے لیے تیار ہے۔انہوں نے امن کے قیام میں روٹری اور سول سوسائٹی سے کردار ادا کرنے کی اپیل کی۔ گورنر خیبرپختونخوا فیصل کریم کنڈی نے بھی روٹری کی خدمات کو سراہا۔تقریب میں گورنر سندھ کامران ٹیسوری، ڈاکٹر فاروق ستار، اور مختلف ممالک کے سفارت کاروں نے شرکت کی۔علاوہ ازیں گورنر سندھ کامران خان ٹیسوری نے روٹری انٹرنیشنل ڈسٹرکٹ کانفرنس 2025 سے خطاب کرتے ہوئے کہا کہ انسانیت کی خدمت ہمارا دینی اور اخلاقی فریضہ ہے۔ انہوں نے روٹری انٹرنیشنل کی خدمات کو سراہتے ہوئے بتایا کہ روٹری کے 10 ملین ڈالرز کی امداد سے پاکستان میں فلاحی منصوبے جاری ہیں۔گورنر سندھ نے بھارتی وزیر اعظم نریندر مودی کی پاکستان مخالف اقدامات پر تنقید کی اور کہا کہ بھارتی حکومت نے زیر علاج پاکستانیوں کو واپس بھجوا کر انسانیت کے خلاف قدم اٹھایا۔ اس کے برعکس روٹری پاکستان نے بھارت کے 1500 بچوں کا علاج کیا، جو ہماری اقدار اور انسان دوستی کو واضح کرتا ہے۔انہوں نے خطے میں کشیدگی پر تشویش کا اظہار کرتے ہوئے کہا کہ پاکستان جنگ میں پہل نہیں کرنا چاہتا، مگر اپنے دفاع کا مکمل حق رکھتا ہے۔ انہوں نے بھارت کو خبردار کرتے ہوئے کہا کہ پاکستان ہر چیلنج کا مقابلہ کرنے کی مکمل صلاحیت رکھتا ہے۔گورنر سندھ نے قوم کو یقین دلایا کہ پاکستانی افواج ہر قسم کے چیلنجز کا مقابلہ کرنے کے لئے تیار ہیں اور کہا کہ فکر کی کوئی ضرورت نہیں ہے۔