سندھ بلڈنگ کنٹرول اتھارٹی کی غیر قانونی تعمیرات کے خلاف کارروائیوں کا آغاز

کراچی، 3 مئی (پی پی آئی)سندھ بلڈنگ کنٹرول اتھارٹی (ایس بی سی اے) کے ڈائریکٹر جنرل محمد اسحاق کھوڑو نے غیر قانونی تعمیرات کے مکمل خاتمے کا فیصلہ کر لیا ہے۔ اس مہم کے تحت مختلف اضلاع میں انہدامی کارروائیاں تیز کر دی گئی ہیں، جہاں اضافی منزلوں اور غیر قانونی تعمیرات کو منہدم کرنے کا عمل جاری ہے۔ڈائریکٹر جنرل ایس بی سی اے نے کہا ہے کہ غیر قانونی تعمیرات شہر کے انفراسٹرکچر کی تباہی کا باعث بن رہی ہیں، اور ان کا خاتمہ ناگزیر ہے۔ انہوں نے شہریوں کو جعلی بلڈرز کے دھوکے میں نہ آنے کی تلقین کی اور خبردار کیا کہ غیر قانونی تعمیرات میں سرمایہ کاری کرنے والے افراد اپنے نقصان کے خود ذمہ دار ہوں گے۔ڈیمالیشن اسکواڈ نے ڈسٹرکٹ ایسٹ، کورنگی، اور ڈسٹرکٹ ساؤتھ کے مختلف علاقوں میں کارروائی کرتے ہوئے کئی عمارتوں کی غیر قانونی اضافی منزلوں اور پورشنز کو منہدم کیا۔ گلشن اقبال ٹاؤن اسکیم 24، پی ای سی ایچ ایس، اور دیگر علاقوں میں بھی غیر قانونی تعمیرات کے خلاف کارروائیاں کی گئیں۔کورنگی ایریا میں متعدد عمارات کی غیر قانونی تعمیرات کے خلاف بھی مؤثر کارروائیاں کی گئی ہیں۔ ان تمام کارروائیوں کے دوران پولیس فورس اور مقامی پولیس کی نفری بھی موجود تھی تاکہ امن و امان کی صورتحال پر قابو پایا جا سکے۔ڈائریکٹر جنرل نے واضح کیا کہ غیر قانونی تعمیرات کے خلاف یہ مہم پورے شہر میں جاری رہے گی، اور عدالتی احکامات کی روشنی میں انہدامی کارروائیاں عمل میں لائی جائیں گی۔ غیر قانونی تعمیرات کے خلاف یہ کارروائیاں ڈپٹی و اسسٹنٹ ڈائریکٹرز اور ڈیمالیشن آفیسرز کی زیر نگرانی کی جا رہی ہیں۔