چینی سفیر کی صدرمملکت سے ملاقات، غیر متزلزل حمایت کی یقین دہانی

اسلام آباد، 5 مئی (پی پی آئی) پاکستان میں عوامی جمہوریہ چین کے سفیر مسٹر جیانگ زیڈونگ نے ایوان صدر میں صدر آصف علی زرداری سے ملاقات کی جس میں دوطرفہ تعلقات پر بات چیت کی گئی جس میں علاقائی پیش رفت کے حوالے سے بالخصوص پہلگام واقعہ کے بعد پاکستان اور بھارت کے درمیان بڑھتی ہوئی کشیدگی سے نمٹنے کے حوالے سے تبادلہ خیال کیا گیا۔صدر زرداری نے بھارتی حکومت کی جانب سے حالیہ بیان بازی پر اپنے تحفظات کا اظہار کیا، جو ان کے خیال میں خطے کے امن و استحکام کے لیے خطرہ ہیں۔ انہوں نے مزید کشیدگی کو روکنے کے لیے ذمہ دارانہ بات چیت کی ضرورت پر زور دیا۔اس کے جواب میں، سفیر جیانگ نے چین پاکستان دیرینہ تعلقات کو “آہنی بھائیوں ” کا تعلق قرار دیاجس نے ہر مشکل دور میں مسلسل باہمی تعاون فراہم کیا۔ انہوں نے پاکستان کے نقطہ نظر پر اظہار تشکر کیا اور جنوبی ایشیا میں امن اور استحکام کے لیے پاکستان کی حمایت کے لیے چین کے غیر متزلزل عزم کا اعادہ کیا۔صدر زرداری نے مشکل وقت میں پاکستان کے ساتھ کھڑے ہونے پرچینی حکومت کے اہم کردار کو تسلیم کرتے ہوئے چین کی غیر متزلزل حمایت کو سراہا۔