واپڈا کی نجکاری کے خلاف پڈعیدن میں احتجاج: ملازمین کا اسلام آباد تک مارچ کا اعلان

نوشہروفیروز،6مئی (پی پی آئی) ہائیڈروالیکٹرک ورکرزیونین کے زیر اہتمام واپڈا اور اس کی تقسیم کار کمپنیوں کی نجکاری کے خلاف ملک گیر احتجاج ہوا۔ پڈعیدن میں واپڈا سب ڈویژن کے ملازمین نے احتجاجی ریلی نکالی جس کی صدارت یونین چئیرمین محمد یونس راجپر نے کی۔ ریلی میں ملازمین نے شرکت کی اور مطالبات کی منظوری نہ ہونے کی صورت میں اسلام آباد مارچ کا اعلان کیا۔ریلی سے خطاب کرتے ہوئے یونین چئیرمین محمد یونس راجپر اور دیگر مقررین نے نجکاری کے فیصلے کی مذمت کی اور کہا کہ اس عمل سے ملازمین میں بیچینی بڑھ رہی ہے جسے ختم کرنے کی ضرورت ہے۔ انہوں نے خالی اسامیوں پر بھرتی، دور دراز علاقوں میں منتقل ملازمین کی واپسی، کنٹریکٹ ملازمین کی ریگولرائزیشن اور t8p گاڑیوں کی فراہمی کا مطالبہ کیا۔مقررین نے کہا کہ یونین ایسے اقدامات کو چیلنج کرتی ہے جو ادارے کو نقصان پہنچاتے ہیں۔ انہوں نے غریب عوام کو آگاہ کیا کہ غیر ملکی قوتیں واپڈا جیسے ادارے کو تباہی کی طرف لے جارہی ہیں۔ اگر مطالبات تسلیم نہ کیے گئے تو اسلام آباد کی جانب مارچ کیا جائے گا۔