مودی سرکار کی خلاف بدین میں مسلم لیگ نواز کی احتجاجی ریلی

بدین،6مئی (پی پی آئی)پاکستان مسلم لیگ نواز ضلع بدین کی جانب سے بھارتی آبی جارحیت اور سندھ طاس معاہدے کی خلاف ورزیوں کے خلاف احتجاجی مظاہرہ کیا گیا۔ ضلعی صدر حاجی ابراہیم کمبوہ اور دیگر رہنماؤں کی قیادت میں کارکنوں نے ڈی سی چوک سے بدین پریس کلب تک ریلی نکالی۔ریلی میں شریک مظاہرین نے ہاتھوں میں بھارت مخالف پلے کارڈز اٹھا رکھے تھے۔ مقررین نے سندھ طاس معاہدے کی خلاف ورزی کو پاکستان کے آبی وسائل پر حملہ قرار دیا اور عالمی برادری سے بھارت کو معاہدے کی پاسداری کا پابند بنانے کا مطالبہ کیا۔مظاہرے میں مسلم لیگ نواز کے رہنماؤں کے ساتھ سول سوسائٹی اور اقلیتی برادری کے نمائندے بھی موجود تھے۔ انہوں نے پاک افواج کے ساتھ اظہار یکجہتی کرتے ہوئے کہا کہ پاکستان کے مفادات کے تحفظ کے لیے ہر فورم پر آواز بلند کی جائے گی۔ مظاہرین نے مودی سرکار اور بھارتی جارحیت کے خلاف شدید نعرے بازی بھی کی۔