میرپورخاص میں شوگر مل کے ڈیلی ویجز ملازمین کا تنخواہوں میں کٹوتی پرشدید احتجاج

میرپورخاص، 8مئی (پی پی آئی)  میرپورخاص شوگر مل کے ڈیلی ویجز ملازمین نے تنخواہوں میں کٹوتی کے خلاف شدید احتجاجی مظاہرہ کیا۔ مظاہرین نے شوگر مل کے سامنے ٹائر جلا کر انتظامیہ کے خلاف نعرے بازی کی۔ ملازمین کا کہنا ہے کہ مہنگائی کے اس دور میں 37 ہزار روپے کی تنخواہ میں گزارا مشکل تھا، اب 25 ہزار کر دینا ظلم ہے۔تفصیلات کے مطابق، شوگر مل میں ڈیلی ویجز پر کام کرنے والے ملازمین کی تنخواہ 37 ہزار سے کم کرکے 25 ہزار کرنے کا اعلان کیا گیا ہے۔ ملازمین نے احتجاجاً شوگر مل کے سامنے سڑک پر ٹائر جلا کر انتظامیہ کے خلاف نعرے بازی کی۔ملازمین کے نمائندے سجاد صدیقی اور دیگر نے بتایا کہ وہ گزشتہ 15 سے 20 سال سے شوگر مل میں کام کر رہے ہیں۔ ان کا کہنا تھا کہ 37 ہزار روپے کی تنخواہ میں گزارا مشکل تھا، اب مزید کم کر کے 25 ہزار کرنا ناانصافی ہے۔ملازمین نے مطالبہ کیا کہ تنخواہوں میں کٹوتی بند کی جائے۔ مظاہرین کا کہنا تھا کہ مہنگائی کے اس دور میں ان کے لیے مالی مشکلات میں اضافہ ہو رہا ہے۔ انہوں نے انتظامیہ سے فوری طور پر اس فیصلے پر نظر ثانی کرنے کا مطالبہ کیا۔