پاکستان امن کا خواہاں ہے مگر جارحیت کو قبول نہیں کرے گا:صدر آرٹس کونسل

کراچی، 8مئی (پی پی آئی) آرٹس کونسل آف پاکستان کراچی نے بھارت کے جنگی جنون کے خلاف ایک پریس کانفرنس کا انعقاد کیا۔ صدر آرٹس کونسل محمد احمد شاہ نے بھارتی حملے کی مذمت کرتے ہوئے کہا کہ پاکستان امن کا خواہاں ہے مگر جارحیت کو قبول نہیں کرے گا۔پریس کانفرنس حسینہ معین ہال، احمد شاہ بلڈنگ میں ہوئی۔ اس میں معروف ادیب و مزاح نگار انور مقصود، سینئر اداکار و نائب صدر منور سعید، اور جوائنٹ سیکریٹری نور الہدیٰ شاہ نے گفتگو کی۔ شاعر افتخار عارف ویڈیو لنک کے ذریعے شریک ہوئے۔محمد احمد شاہ نے کہا کہ بھارت نے 7 مئی کو بزدلانہ حملہ کیا جس میں 30 سے زائد جانوں کا نقصان ہوا۔ انہوں نے کہا کہ پاکستان کے فوجی جوانوں نے بھرپور جواب دیا اور یہ واضح کیا کہ پاکستان ایک مضبوط ملک ہے۔انور مقصود نے کہا کہ جنگ شروع کرنا آسان ہے مگر ختم کرنا مشکل۔ انہوں نے مزید کہا کہ دونوں ممالک کی عوام جنگ نہیں چاہتے اور ہمیں ترقی کے راستے پر چلنا چاہیے۔افتخار عارف نے کہا کہ انسانی جانوں کا ضیاع افسوسناک ہے۔ انہوں نے بین الاقوامی برادری سے امن کے قیام کے لیے کردار ادا کرنے کی اپیل کی۔نور الہدیٰ شاہ نے بھارت کے میڈیا کو تنقید کا نشانہ بناتے ہوئے کہا کہ جنگ کی حوصلہ افزائی کرنا خطرناک ہے۔ انہوں نے کہا کہ ادیب اور فنکار برادری کو سوچ سمجھ کر بولنا چاہیے۔پیرزادہ قاسم نے کہا کہ پاکستان اور بھارت کے درمیان اچھے تعلقات ضروری ہیں۔ انہوں نے کہا کہ ہمیں معاشرے کو نالج بیسڈ سوسائٹی بنانا ہے، نہ کہ جنگ کو فروغ دینا۔