آزاد کشمیر میں ہنگامی صورتحال کے لئے ریڈ کریسنٹ کی تیاریوں کا جائزہ

مظفرآباد، 7 مئی (پی پی آئی) صدر آزاد جموں و کشمیر بیرسٹر سلطان محمود چوہدری سے پاکستان ریڈ کریسنٹ سوسائٹی آزاد کشمیر برانچ کے چیئرمین سردار شفیق احمد خان اور سیکرٹری محترمہ گلزار فاطمہ نے ملاقات کی۔ ملاقات کے دوران ریڈ کریسنٹ کے نمائندوں نے صدر کو ہنگامی صورتحال میں امدادی تیاریوں کے بارے میں تفصیلی بریفنگ دی۔ انہوں نے بتایا کہ موبائل ہیلتھ یونٹس، رضاکاروں کی تربیت، اور کمیونٹی ڈویلپمنٹ کی کوششیں جاری ہیں تاکہ ناگہانی حالات میں لوگوں کی بروقت مدد کی جا سکے۔صدر آزاد کشمیر نے ریڈ کریسنٹ کی کوششوں کو سراہا اور کہا کہ یہ ادارہ ہنگامی حالات سے نمٹنے کے لئے ہمیشہ تیار رہنا چاہیے۔ انہوں نے یقین دہانی کرائی کہ وہ فنڈز اور دیگر مسائل کے حل کے لئے حکومت سے بات کریں گے۔ریڈ کریسنٹ کے نمائندوں نے صدر کو یقین دلایا کہ وہ محدود وسائل کے باوجود ہر طرح کی ہنگامی صورتحال کے لئے تیار ہیں۔ انہوں نے صدر کو بتایا کہ ان کی کوششیں لوگوں کو محفوظ مقامات پر منتقل کرنے اور امداد کی فراہمی کو یقینی بنائیں گی۔